Gjermania ka nevojë për 120 mijë shoferë kamioni ?

Gjermania po përballet me një mungesë serioze të shoferëve të kamionëve, një problem që rrezikon funksionimin normal të zinxhirit të furnizimit në njërën nga ekonomitë më të mëdha të Evropës. Sipas Shoqatës Gjermane të Transportit Rrugor, Logjistikës dhe Asgjësimit të Mbeturinave (BGL), aktualisht mungojnë rreth 120 mijë shoferë kamioni në të gjithë vendin.

Zëdhënësi i BGL-së, Dirk Engelhardt, ka deklaruar për agjencinë “Reuters” se paga mesatare bruto për shoferët e kamionëve në Gjermani është rreth 3,048 euro në muaj. Megjithatë, kjo shumë mbetet më e ulët krahasuar me pagën mesatare bruto të popullsisë, e cila arrin në 4,346 euro.Çdo vit, nga 30 deri në 35 mijë shoferë dalin në pension, ndërsa tregu i punës arrin të sigurojë vetëm 15 deri në 20 mijë zëvendësime të reja. Kjo do të thotë se hendeku po thellohet vazhdimisht. Situata bëhet edhe më kritike duke pasur parasysh faktin se rreth 80 për qind e mallrave në Gjermani transportohen përmes rrugëve tokësore.

“Po dëgjojmë nga shumë kompani transporti se po heqin gjithnjë e më shumë kamionë nga qarkullimi dhe po anulojnë porositë, sepse thjesht nuk kanë shoferë të mjaftueshëm”, ka theksuar Engelhardt. Për shkak të mungesës së fuqisë punëtore dhe rritjes së kostove të personelit, shumë kompani logjistike po heqin dorë edhe nga pjesëmarrja në tenderë, pasi fitimi i pritshëm nuk mbulon shpenzimet.Shoqata e industrisë nuk pret që teknologjia e drejtimit autonom të zgjidhë këtë problem në një të ardhme të afërt.

Edhe pse kamionët autonomë përdorin sensorë, kamera dhe inteligjencë artificiale, shoferët do të mbeten të domosdoshëm si shoqërues dhe përgjegjës për mallrat. “Ata janë përgjegjës për dorëzimin e ngarkesës sipas ligjit, si dhe për transportin dhe sigurimin e saj. Vetëm njerëzit mund të reagojnë në situata të paparashikuara”, ka shtuar Engelhardt.

/ts