Frikë nga një fitore e AfD-së: Emigrantët mendojnë të largohen nga Gjermania
Një fitore e mundshme historike e AfD-së në zgjedhjet në Saksoni-Anhalt po rrit shqetësimin mes migrantëve. Disa prej tyre po mendojnë largimin nga landi, nga frika e politikave më të ashpra të migracionit dhe rritjes së armiqësisë ndaj të huajve, raporton AFP.
Kandidati i AfD-së për kryeministër, Ulrich Siegmund, ka paralajmëruar dëbimin e personave që qëndrojnë ilegalisht në Gjermani ose kanë urdhër largimi. Ai ka theksuar se migracioni i rregullt, sipas kritereve të përcaktuara, nuk do të ishte problem.
Retorika politike ka shtuar pasigurinë. Në Magdeburg, rreth 150 restorante, kioska dhe berberhane të drejtuara nga migrantë u mbyllën përkohësisht në shenjë proteste ndaj klimës që ata e konsiderojnë gjithnjë e më ksenofobe.
Mes të shqetësuarve është edhe kardiologu sirian Ayman Alyoussef, i cili jeton në Gjermani që nga viti 2014 dhe tashmë është shtetas gjerman.
“Kam frikë se urrejtja ndaj të huajve do të përhapet”, ka deklaruar ai për AFP, duke shtuar se mund të largohet nga Saksoni-Anhalti nëse situata përkeqësohet.
Një largim i migrantëve mund të shkaktojë edhe pasoja ekonomike. Saksoni-Anhalti përballet prej vitesh me mungesë të fuqisë punëtore, ndërsa sektori i shëndetësisë varet në masë të madhe nga profesionistët me prejardhje të huaj.
Drejtori i klinikës në Quedlinburg, Matthias Voth, ka thënë se pa punonjësit e huaj institucioni i tij nuk do të mund të funksiononte.
Edhe migrantë të tjerë thonë se po shqyrtojnë largimin pas zgjedhjeve. Për këtë arsye, rezultati në Saksoni-Anhalt pritet me interes jo vetëm politik, por edhe për ndikimin e mundshëm mbi migrantët, ekonominë dhe shëndetësinë.
/lajmpress
