Florian Haçkaj: Diaspora ngrihet në Kërmbë (VIDEO)
Në një intervistë për podcastin “Zërat e Iliridës”, Haçkaj u shpreh se protesta nuk duhet të kufizohet vetëm te kërkesa për largimin e Kryeministrit Edi Rama, por duhet të shndërrohet në një lëvizje që synon reforma të qëndrueshme dhe ndryshime reale në funksionimin e shtetit.
Sipas Haçkaj, protesta po fiton mbështetje të gjerë dhe pritet të zgjerohet edhe më tej në ditët dhe javët në vijim.
“Shohim çdo ditë më shumë qytetarë që po bashkohen. Kjo lëvizje po rritet dhe besoj se do të vazhdojë të bëhet edhe më e madhe”, u shpreh ai.
Një nga pikat kyçe të ndryshimeve që kërkon diaspora, sipas Hackajt, lidhet me reformimin e Kodit Zgjedhor dhe krijimin e mekanizmave që garantojnë përfshirjen reale të shqiptarëve që jetojnë jashtë vendit.
Ai nënvizoi se diaspora duhet të ketë një përfaqësim dinjitoz dhe efektiv në proceset vendimmarrëse, në mënyrë që të mund të luajë rolin e saj konstruktiv në shtetformim.
“Ndryshimet duhet të prekin edhe Kodin Zgjedhor. Diaspora nuk mund të trajtohet vetëm si një burim votash apo remitancash. Shqiptarët jashtë vendit duhet të kenë përfaqësim të denjë dhe mundësi reale për të kontribuar në ndërtimin e së ardhmes së Shqipërisë”, deklaroi ai.
Florian Haçkaj vlerësoi gjithashtu se një nga arritjet më të mëdha të protestave ka qenë bashkimi i diasporës shqiptare, pavarësisht dallimeve gjeografike apo politike.
Sipas tij, kjo frymë uniteti është një realitet i ri që ka lindur si rezultat i mobilizimit qytetar.
Në të njëjtën kohë, ai akuzoi qeverinë aktuale se po përpiqet të krijojë ndasi mes shqiptarëve që jetojnë jashtë vendit dhe atyre që jetojnë në Shqipëri.
“Bashkimi i diasporës shqiptare është tashmë një realitet. Fatkeqësisht, qeveria e tanishme tenton të krijojë ndarje mes shqiptarëve brenda dhe jashtë kufijve të Shqipërisë, ndërkohë që ne besojmë se vetëm përmes bashkëpunimit mund të ndërtohet një e ardhme më e mirë”, tha Hackaj.
Në fund të intervistës, ai përcolli një mesazh për rëndësinë e angazhimit qytetar dhe rolin e opozitarizmit në demokraci.
Sipas tij, çdo shoqëri ka nevojë për një opozitë aktive dhe kritike ndaj çdo qeverie, pavarësisht se kush është në pushtet.
“Është thelbësore të jemi opozitarë ndaj çdo qeverie kur është e nevojshme. Vetëm përmes llogaridhënies, kritikës konstruktive dhe pjesëmarrjes qytetare mund të ecë përpara një vend”, përfundoi Hackaj. Bisedën e plotë me Florian Haçkaj e gjeni në kanalin “Zërat e Iliridës”.
VIDEO:
/ts
