Falet namazi i Kurban Bajramit në Maqedoni

Besimtarët e fesë islame sot po festojnë Kurban Bajramin, festën e dytë më të madhe për myslimanët pas Fitër Bajramit. Në të gjitha xhamitë është falur namazi i Kurban Bajramit, i cili këtë mëngjes u fal nga ora 05:46.

Në ditën e parë të Bajramit bëhet lutja e Bajramit – namazi i Bajramit, përmes të cilit besimtarët kërkojnë mëshirë dhe falje nga Allahu. Pas faljes së namazit, besimtarët kanë uruar njëri-tjetrin për paqe, harmoni dhe mirësi në familjet e tyre.

Kurban Bajrami është festë e solidaritetit, shpresës dhe optimizmit, ku në çdo vatër duhet të mbizotërojë gëzimi, ndihma dhe përkrahja për njëri-tjetrin. Sipas traditës islame, karakteristikë e kësaj feste është edhe therja e kurbanit, që simbolizon afrimin ndaj Zotit dhe sakrificën në emër të Tij.

Zakonisht kurbani bëhet me deshë ose viça, ndërsa mishi shpërndahet për të varfrit, fqinjët dhe të afërmit, me qëllim që të gjithë të ndajnë gëzimin e kësaj feste.

Kjo festë lidhet edhe me ngjarje të rëndësishme në historinë islame, si Haxhi dhe rindërtimi i Qabes. Kurban Bajrami zgjat tri ditë dhe konsiderohet si festa që kurorëzon Haxhin, shtyllën e pestë të Islamit.

/ms