Bujar Osmani ankohet tek institucionet e BE për problemet ?

Ish-Ministri i Jashtëm i Maqedonisë së Veriut nga radhët e BDI-së, Bujar Osmani, është ankuar dje tek anëtarët e Parlamentit Evropian dhe zyrtarët e Komisionit të BE-së për mosmarrëveshje të reja ndëretnike në vend të ndërlidhura me siç thotë ai “anulimin” e Marrëveeshjes së Ohrit.

Osmani, u takua sot me eurodeputetët Lukas Mandl dhe Ilhan Kyuchyuk, dhe zyrtarë të Komisionit Evropian për të shpalosur qëndrimet e partisë opozitare për gjendjen aktuale në vend, si dhe bllokadën që po vazhdon në rrugën e premtuar për në bllokun evropian.

“Diskutuam sfidat serioze ndaj konceptit të shtetit multietnik dhe europian në Maqedoninë e Veriut, që po vihet në pikëpyetje nga aktorë të ndryshëm. Theksova se mbrojtja e këtij parimi kërkon qasje të organizuar dhe koordinim të gjerë si kusht për stabilitetin politik dhe rrugën evropiane të vendit”, shkroi Osmani pas takimit me deputetin austriak Lukas Mandl.
Ai pastaj u takua edhe me deputetin bullgar Ilhan Kyuchyuk.

“Fokusi ishte te procesi i integrimit evropian dhe nevoja për të rikthyer momentumin që është humbur muajt e fundit. Biseduam për pengesat aktuale dhe për hapat konkretë që duhen ndërmarrë për të ecur përpara. Mesazhi im ishte i qartë: integrimi nuk pret kërkon vendime të guximshme në vend dhe angazhim të vazhdueshëm nga partnerët evropianë,” ka shkruajtur Osmani.
Osmani u takua gjithashtu me Emanuel Gioffret, Drejtor për Evropën në Shërbimin Evropian të Veprimit të Jashtëm (EEAS), dhe me Valentina Superti, Drejtoreshë për Ballkanin Perëndimor në Drejtorinë e Përgjithshme për Zgjerim dhe Fqinjësi (DG ENEST) në Komisionin Evropian.

“Theksova shqetësimin serioz për anulimin e Marrëveshjes Paqësore të Ohrit si shtylla kryesore e bashkëjetesës dhe kohezionit ndëretnik dhe shtetëror. Njëkohësisht, nënvizova nevojën urgjente për të tejkaluar bllokadën në procesin e integrimit evropian dhe për të rikthyer besimin në perspektivën evropiane. Rruga drejt Bashkimit Evropian nuk guxon të mbetet peng i ngecjeve politike. Ajo kërkon përgjegjësi, vendime të qarta dhe një partneritet të fortë me institucionet evropiane”, shkroi Osmani në një tekst përmes Facebook-ut.

/Zhurnal.mk