Apel urgjent drejt insitucioneve të Komunës së Kërçovës !

I lusim institucionet përkatëse të Komunës së Kërçovës dhe të Republikës që të ndërmarrin masa të menjëhershme për pastrimin dhe rregullimin e ambienteve të tribunës së stadiumit të KF “Vëllazërimi” në lagjen Pashinë, meqë kështu e lënë pas dore është shndërruar në MOÇAL që përbën rrezik të madh për shëndetin dhe mirëqenien e banorëve përreth dhe çdokujt që kalon në këto anë.

Menjëherë përballë këtij moçali ka shtëpi ku banojnë njerëz, fëmijë e të moshuar, a më pak se 100m nga këtu ka shkollë fillore ku mësojnë qindra fëmijë. Moçalet jo vetëm që shkaktojnë aromë të pakëndshme e ambient të shëmtuar, por edhe janë hapësira ku mblidhen papastërti, insekte, kafshë, mbetje dhe janë qendra të përhapjes së sëmundjeve nëpër njerëz.

Është e patolerueshme që të jetohet në mjedis të tillë e posaçërisht të lejohet të krijohen kësi situatash, andaj kërkojmë veprim urgjent për pastrimin dhe sigurimin e kësaj hapësire e të shmangen fatkeqësi për fëmijë, të rritur, e të moshuar!
I lus të gjithë që ta shpërndajnë këtë postim sa më shumë, që të mbërrijë sa më shpejt në veshët e sytë e institucioneve përkatëse!
Shkruan një qytetar i brengosur tek redaksia kercova.net.

/ms