Alarm në Itali nga Hantavirus !
Autoritetet italiane të shëndetësisë kanë vendosur në mbikëqyrje katër pasagjerë të një fluturimi, pasi ata rezultuan të kenë pasur kontakt me një grua të shtruar në spital në Johannesburg, e cila ndërroi jetë nga virusi.
Ministria italiane e Shëndetësisë bëri të ditur se të dhënat e personave të përfshirë u janë dërguar rajoneve të Kalabrisë, Kampanias, Toskanës dhe Venetos, për të zbatuar procedurat e kontrollit dhe monitorimit, në kuadër të masave parandaluese.
Në Toskanë, autoritetet lokale konfirmuan se një grua nga Firence është futur në karantinë si masë sigurie. Këshilltarja rajonale e Shëndetësisë, Monia Mini, deklaroi se protokollet janë aktivizuar menjëherë dhe se gruaja po mbahet nën vëzhgim deri në daljen e përgjigjeve të analizave.
Sipas Rajonit të Toskanës, kontakti mes saj dhe viktimës ka ndodhur gjatë hipjes në avion dhe nuk konsiderohet kontakt i afërt apo i zgjatur. Megjithatë, autoritetet kanë vendosur monitorim gjatë gjithë periudhës së inkubacionit dhe po gjurmojnë çdo kontakt të mundshëm të saj.
Guvernatori i Toskanës, Eugenio Giani, siguroi se strukturat shëndetësore janë në gatishmëri të plotë dhe se situata po ndiqet me vëmendje të lartë, pavarësisht se rreziku vlerësohet i kufizuar.
Nga ana tjetër, Ministria italiane e Shëndetësisë theksoi se janë aktivizuar të gjitha procedurat e vlerësimit të rrezikut dhe koordinimit, sipas protokolleve kombëtare dhe ndërkombëtare.
Sipas vlerësimeve të OBSH-së dhe ECDC-së, rreziku për popullatën mbetet i ulët në nivel global dhe shumë i ulët në Evropë.
Ndërkohë, kompania “Oceanwide Expeditions” ka informuar pasagjerët e anijes MV Hondius për zhvillimet e fundit. Në bord ndodhet edhe një epidemiolog italian i ECDC-së, i angazhuar në mbështetjen e operacioneve emergjente që prej 6 majit.
/joq
