Këto janë deputetët tjerë që posedojnë armë !?

Deputeti i ZNAM-it, Pavle Arsoski posedon një koleksion armësh. Në fletën anketuese që ai e ka dorëzuar si deputet i Kuvendit të Maqedonisë së Veriut, Arsoski ka deklaruar pesë armë zjarri, të gjitha të marra me kontratë për blerje. Ajo që është e dyshimtë është se vlera e tyre e deklaruar e shprehur në denarë është shumë e vogël dhe sillet nga 42 deri në 90 denarë, shkruan Scoop, transmeton Portalb.mk.

Adhurues i armëve është edhe kolegu i tij deputeti i Aleancës për Shqiptarët, Rijad Shaqiri. Në emër të tij ai ka regjistruar tre armë me vlerë të përgjithshme prej rreth 2.500 euro. Arma më e shtrenjtë e regjistruar ka vlerë prej një mijë eurosh dhe të tria i ka me leje për armëmbajtje.

Nga deputetët e tjerë armë posedon edhe Ilir Hasani dhe Мusa Xhaferi nga radhët e BDI-së, si dhe deputeti i VMRO-DPMNE-së, Zoran Kocevski.
Mjeku deputet nga radhët e BDI-së, Ilir Hasani, në fletën e tij anketuese ka deklaruar një armë. Në emër të tij ai posedon armë të marrë me leje me vlerë prej rreth një mijë euro. Armët në emër të tij ka deklaruar edhe bashkëpartiaku i tij, Мusa Xhaferi.

Arma e tij ka një vlerë prej rreth 850 euro dhe siç është shënuar ajo është blerë në vitin 2015. Deputeti i VMRO-DPMNE-së, Zoran Kocevski, ka deklaruar armë në vlerë prej 400 euro, të fituar me kontratë për shitblerje.

Armë në emër të prindërve ka deklaruar edhe deputetja më e re në përbërjen parlamentare, Dragana Bojkovska nga VMRO-DPMNE-ja. Ajo ka deklaruar tre armë në emër të prindit të saj, të gjitha të marra me kontratë për shitblerje për 500 euro copa.

Për armë në emër të prindërve ka deklaruar edhe socialisti Nikolla Konjanovski. Bëhet fjalë për një armë në vlerë prej 400 euro, e cila është blerë me kërkesë për blerje dhe posedim të armëve dhe me leje nga Ministria e Punëve të Brendshme (MPB).

Edhe deputetja Bllagica Llasovska ka deklaruar armë në emër të bashkëshortit të saj. Ajo ka deklaruar dy armë, njëra prej të cilave me vlerë 250 euro e blerë me kontratë për shitblerje. Për armën e dytë nuk ka deklaruar vlerë, ndërsa ka deklaruar që të njëjtën e ka trashëguar.

/portalb