Ose bullgarët në Kushtetutë, ose mbyllet rruga evropiane për Maqedoninë !
Ish-kryeministrat e Bullgarisë, Bojko Borisov dhe Kiril Petkov, thanë sot se Marrëveshja e fqinjësisë së mirë duhet të respektohet dhe u bënë thirrje autoriteteve në Maqedoninë e Veriut që të vendosin nëse do t’i përfshijnë bullgarët në Kushtetutë apo nëse rruga e tyre drejt BE-së do të mbetet të mbyllura.
Lideri i GERB Borisov, i cili është edhe kryetar i Komisionit për Politikë të Jashtme në Parlamentin bullgar, theksoi se Bullgaria dhe Maqedonia e Veriut nënshkruan Marrëveshjen e Fqinjësisë së Mirë, e cila është përfshirë në planin e zgjerimit dhe askush nuk mund të devijojë prej saj.
Borisov beson se Sofja duhet të qëndrojë e qetë dhe e duruar, të mos shfaqet agresive sepse, siç tha ai, “fajin e kanë kolegët në Shkup”.
Ai vuri në dukje se “kushdo që shkel tonin e mirë, dhe jo Bullgaria, do të vuajë pasojat”.
“Gjithçka që bëmë në Partinë Popullore Evropiane, në Këshillin Evropian, në Komisionin Evropian, u dëgjua shumë mirë. Kështu funksionojnë institucionet evropiane. Nuk kërcënojnë, nuk shajnë dhe rezultati është që Shqipëria ecën përpara.
Ajo pranoi pakicën bullgare dhe kolegët tanë nga Maqedonia e Veriut duhet të mbajnë pasojat e sjelljes së tyre të deritanishme”, tha Borisov në prag të shqyrtimit të deklaratës për Maqedoninë e Veriut të dorëzuar nga partia e ekstremit të djathtë “Rilindja”.
Borisov thotë se do të përpiqet t’i bindë kolegët e tij në Komisionin për Politikë të Jashtme që të mos sillen emocionalisht, por pragmatikisht dhe me sens.
Dhe lideri i PP-DB, Kiril Petkov, thotë se Shkupi duhet të vendosë nëse dëshiron t’i pranojë bullgarët në kushtetutën e tij apo të ndalojë rrugën drejt BE-së.
“Koha ka treguar se marrëveshja që bëmë në kohën e qeverisë sonë – propozimi francez – doli të ishte shumë e mirë për Bullgarinë. Në fakt, i gjithë Bashkimi Evropian doli në anën e Bullgarisë. Republika e Maqedonisë së Veriut duhet të vendosë nëse dëshiron të pranojë bullgarët në kushtetutën e saj apo rruga e saj drejt Evropës është e mbyllur. Shpresoj shumë që ata të rishqyrtojnë, sepse ajo që ndodhi tani është se Shqipëria po ndahet prej tyre dhe do të vazhdojë shpejt rrugën drejt BE-së”, tha Petkov.
Ndarja e Shqipërisë nga Maqedonia e Veriut në rrugën drejt BE-së u përshëndet nga kreu i “Prerodba” Kostadin Kostadinov. Sipas tij, kjo ndodhi pasi “Tirana njohu minoritetin bullgar dhe garantoi të gjitha të drejtat kushtetuese të tyre”.
/(INA)
