VLEN: Nuk do ta rehabilitojmë mykun e BDI-së..!

Nga koalicioni VLEN thonë se BDI po përpiqet të shitet si viktimë politike e partive tjera politike në vend, përcjell TV21. Nga koalicioni në pushtet akuzojnë BDI-në opozitare për pengesa në punët e institucioneve shtetërore, përmes, siç thonë nga VLEN, njerëzit e tyre në këto institucione.

“Nuk është rastësi që kemi thënë se ata duhet të riemërohen në Bashkim Jodemokratik për Dezintegrim. Myku i BDI-së në institucionet shtetërore ka marrë urdhër që të bllokojë në çdo mënyrë të mundshme punën e qeverisë së re. Pas 22 viteve të regjimit, ata kanë lënë pasardhësit e tyre në sistemin gjyqësor, diplomaci, shërbimet e sigurisë, ministritë resore, institucionet shtetërore dhe mediat.

Axhenda e tyre shkatërruese përfshin përpjekje për të dëmtuar marrëdhëniet dypalëshe me Kosovën, Bullgarinë dhe Greqinë, me qëllim pengimin e rrugës sonë drejt BE-së. Ata, përmes instalimeve të tyre, vendosin stërkëmbëza në sistem për të parandaluar drejtësinë, ndërsa megafonat e tyre janë të ngarkuar të krijojnë histeri. Populli shqiptar i ka zbuluar prej kohësh dhe nuk bie më në kurthet e tyre.

Struktura e tyre e frikësuar, brenda dy muajve të parë të formimit të Qeverisë së re, ka ofruar shërbimet e saj për koalicionin VLEN. VLEN zgjodhi rrugën më të vështirë dhe nuk do të rehabilitojë mykun e BDI-së”, thuhet mes tjerash në reagimin e VLEN.

/tv21