Po afrohet fundi i masave restriktive (VIDEO)

Procesi i kthimit të jetës në normalitet për qytetarët e Maqedonisë do të fillojë pas 1 majit. Këtë informacion në profilin e tij në Facebook e shpërndau Kryeministri Oliver Spasovski.

“Jemi duke përgatitur një plan serioz për të filluar procesin e kthimit në normalitet pas festave të një majit. Kjo nuk do të bëhet me ritëm të shpejtë e as menjëherë ”, ka shkruar Spasovski në profilin e tij në Facebook.

Nga Qeveria në mënyrë jozyrtare thonë se po bëhen përgatitjet për zbutjen e kufizimeve në të gjithë vendin, të cilat do të jenë në disa faza. Si masa e parë që me siguri do të ndërmerret është zvogëlimi i kohëzgjatjes së orës policore, por me mbajtjen e detyrueshme të maskave ose shamive. Edhe më tej do të mbetet në fuqi ndalesa për grupim dhe distanca e detyrueshme prej dy metrash. Në këtë fazë, do të jetë një masë lehtësuese që shkelësit të marrin vetëm paralajmërim dhe më pas gjoba.

Sidoqoftë, nëse vjen deri te shqiptimi i dënimeve, policia do të jetë e detyruar të ketë foto që do ta justifikojë dënimin, thonë për Alsat nga Qeveria.

Ndërkohë, masa lehtësuese tashmë po zbatojnë disa shtete si Gjermania, Sllovenia, Austria, madje edhe shteti më i prekur në Evropë, Italia. Fillimisht janë hapur shitoret më të vogla dhe marketet, serviset për automobila dhe biçikleta e deri te kapacitetet më të mëdha të prodhimtarisë si dhe fabrikat. Sipas planit të autoriteteve sllovene, përsëri hapen edhe terrenet për tenis dhe golf kurse vijon qarkullimi i linjave të autobusëve për transport të organizuar të punëtorëve.

Së shpejti pritet të hapen edhe sallonet e bukurisë dhe kozmetikës. Në Gjermani paralajmërohet kthimi i nxënësve nëpër shkolla që duhet ta japin provimin e maturës, por edhe hapjen e shkollave më 4 maj. Por, për momentin ende nuk është e qartë kush mund të kthehet nëpër klasat shkollore. Ndërsa edhe krahas masave lehtësuese, në fuqi do të mbetet distanca sociale. Organizata Botërore e Shëndetësisë nga konferenca e saj virtuale me ministrat e shëndetësisë të vendeve G20, porositi që shfuqizimi i masave shtrënguese nuk do të thotë fund i epidemisë në asnjë shtet.

“Vendet të sigurohen se kanë kapacitete të bëjnë teste, të sigurojnë izolim dhe të kujdesen për çdo rast, si dhe ta ndjekin çdo kontakt dhe të sigurojnë se sistemet e tyre të shëndetësisë kanë kapacitet të menaxhojnë me çdo rritje të rasteve”-pohoi Tedros Adanom Gebrejesus- drejtor i OBSH-së.

OBSH-ja rekomandon që në fazën e ardhshme vendet t’i edukojnë, angazhojnë dhe përgatisin njerëzit e tyre që të pengojnë dhe shpejtë të përgjigjen ndaj çdo dukurie virusale.

VIDEO:

https://www.youtube.com/watch?v=M7tYnLME4ww

/alsatm