Kërçovë, gjykata ka 8 gjykatës dhe 3.614 lëndë të pazgjidhura..!

Gjykata e Kërçovës përballet me mungesën e gjykatësve dhe numrin e madh të lëndëve të pazgjidhura që erdhi si pasojë e pensionimit të disa gjykatësve, por falë angazhimit të 4 gjykatësve të deleguar nga Këshilli Gjyqësor, në Gjykatën Themelore të Kërçovës, janë trajtuar dhe kanë marrë epilog shumë lëndë gjyqësore të zvarritura për vite me radhë.

Gjykata e Kërçovës prej vitesh është ballafaquar me mungesën e kuadrit gjyqësor, por kohëve të fundit, kjo situatëu rëndua edhe më tepër me pensionimin e disa gjykatësve, të cilët lanë pa u zgjidhur një numër të madh të lëndëve gjyqësore.

Përveç Kërçovës, kjo gjykatë, mbulon edhe Dibrën dhe Makedonski Brodin. Vitin e kaluar gjykata e Kërçovës mbeti me vetëm 4 gjykatës, por me vendim të Këshillit Gjyqësor, Gjykatës së Kërçovës iu deleguan edhe 4 gjykatës të tjerë, të cilët sado pak e kanë lehtësuar procesin e punës në zgjidhjen e lëndëve gjyqësore, thotë kryetarja e Gjykatës së Kërçovës, Fluturije Dervishi, e cila shton se, vetëm gjatë muajit dhjetor të vitit të kaluar, u zgjidhën rreth dy mijë lëndë, kryesisht të sektorit civil që ishin zvarritur për shkak të mungesës së kuadrit gjyqësor.

“Aktualisht numri i lëndëve të pazgjidhura në Gjykatën Themelore të Kërçovës, është 3 mijë e 614 lëndë, prej të cilave pjesa dërrmuese i takon fushës së të drejtës civile, për të cilat janë angazhuar 5 gjykatës, ndërsa për lëndët e sektorit penal, përfëshirë këtu edhe kundërvajtjet dhe procedurat hetimore, janë angazhuar 2 gjykatës”, u shpreh kryetarja e Gjykatës Themelore të Kërçovës, Fluturije Dervishi.

Aktualisht Gjykata e Kërçovës funksionon me 46 të punësuar, por sipas sistematizimit në këtë institucion janë paraparë 134 vende të punës. Duke u nisur nga numri i madh i lëndëve dhe territori që e mbulon Gjykata e Kërçovës, është nevojë imanente rritjaenumrit të gjykatësve dhe punëtorëve administrativ.

/mrt2