Berisha pa imunitet, gati për t’u arrestuar..!

Këshilli i Mandateve ka miratuar me 6 vota pro dhe asnjë kundër kërkesën e SPAK-ut, për autorizimin e ish-kryeministrit Sali Berisha. Raporti i Këshillit të Mandateve do të përgatitet deri të mërkurën nga Klotilda Bushka dhe më pas do t’i kalojë Kuvendit për miratim në seancën e 21 dhjetorit.

Berisha vendosi mos të shkonte në Këshillin e Mandateve, por të përfaqësohej nga avokatët Genc Gjokutaj dhe Sokol Mëngjesi. Teksa pritej të merrej një vendim për Berishën, para Kryesisë dje u mblodhën dhjetëra mbështetës të Berishës, bashkë me ish-kryeministrin, të cilët kundërshtojnë kërkesën e SPAK.

Në shkresën drejtuar Kuvendit, më 12 dhjetor SPAK argumenton se ish-kryeministri nuk ka zbatuar vendimin e gjykatës duke mos u paraqitur asnjëherë para oficerit të policisë gjyqësore/hetuesit.

Pas kësaj kërkese, në Gjykatën Kushtetuese u depozitua një kërkesë nga deputeti Oerd Bylykbashi, ku kërkohet zgjidhja e konfliktit të kompetencave ligjore mes SPAK-ut dhe Kuvendit, “për sa i përket heqjes ose kufizimit të lirisë ndaj një deputeti, në të gjitha format, kur këto kufizime të lirisë kryhen nga pushteti gjyqësor pa pyetur, pa kërkuar e pa marrë paraprakisht autorizimin e shprehur të Kuvendit”.

/koha.mk