Shqiptarët më të stresuarit në Ballkan..!
Shqiptarët janë më të stresuarit në Ballkan për vitin 2021. Këto rezultate dalin në pah nga raporti i kompanisë amerikane Gallup.
Matjet e realizuara nga Indeksi i Emocioneve për vitet 2021/2022, tregojnë se 59% e shqiptarëve kanë pohuar se stresi ka mbizotëruar mbi ndjesitë e mira apo pozitive, një shifër kjo goxha shqetësuese.
Raporti për vitin që lamë pas, ka arritur të thyejë edhe rekordin e vitit 2020, vit kur pandemia pushtoi të gjithë globin. Rreth 41 për qind e të rriturve në të gjithë botën, pranuan se në 2021 përjetuan më shumë stres se më parë.
Por duket se një tjetër pandemi është në prag. Vetmia, një fenomen i heshtur, ka një tendencë në rritje. Një e pesta e të intervistuarve, pohuan se nuk kanë një person të vetëm tek i cili mund të mbështeten për ndihmë.
Puna është një tjetër faktor ndikues në shtimin e stresit. Kur njerëzit nuk janë të kënaqur aty ku kalojnë 8 orë të ditës, statistikisht kanë më shumë gjasa të përjetojnë emocione negative sesa dikush që nuk ka punë fare.
/albora
