Kamberi zgjidhet deputet në Kuvendin e Serbisë..

Bazuar në rezultatet preliminare të votimeve të së enjtes, në Tërnoc të Madh, shqiptarët e Luginës së Preshevës do të kenë një deputet në Kuvendin e Serbisë.

Dhe ai do të jetë Shaip Kamberi, nëse këto rezultate zyrtarizohen.
Sipas këtij portal, Koalicioni i Shqiptarëve të Luginës ka marrë 698 vota nga 610 të nevojshme për të siguruar një mandate në Kuvendin e Serbisë.

Të drejtë vote në këtë vendvotim kishin 1.089 qytetarë. Votimi i së enjtes në Tërnovc të Madh ishte i pesti në tre muajt e fundit. Në katër herët e para, procesi është anuluar për shkak të parregullësive të pretenduara.

Me fitimin e mandatit nga Kamberi, partisë së Ivica Daçiqit do t’i merret një mandat në Kuvendin e Serbisë. Dhe sipas Koalicionit të Shqiptarëve të Luginës, kjo parti ka krijuar telashet kryesore dhe ishte shkaktare për këtë maratonë zgjedhjesh në Tërnovc.

Kamberi ishte edhe në dy mandate të tjera deputet në Kuvendin e Serbisë.
Në reagimin e tij të parë Kamberi tha se denjësisht do t’i përfaqësojë shqiptarët.

Ja reagimi i tij:
Të dashur qytetarë,
Me krejt politikën dhe veprimet penguese të (pu)shtetit qendror, shqiptarët vendorë nuk mbeten pa deputet në parlamentin e ri të Serbisë.

Kjo sot falë votuese të Tërnocit. Kjo në përgjithësi falë vullnetin të shqiptarëve të Luginës së Preshevës. Kjo falë punës së palodhshme të aktivistëve dhe simpatizuesve, atyre të Koalicionit të Shqiptarëve të Luginës. Kjo falë përkrahjes së madhe nga kudo ku përqafohen vlerat e demokracisë liberale. Nga kudo ku flitet shqip.

Ju faleminderit të gjithëve nga zemra.
Përgjegjësitë janë të mëdha. Problement janë të shumta. Konteksti është i vështirë.

Por me punë dhe unitet do t’ia dalim.
Zotohem se do të jem deputet i të gjithëve.

Zotohem se do t’i mbrojë interesat e qytetarëve që duan të drejta dhe mirëqenie. Interesat e shqiptarëve të shtypur dhe të diskriminuar.
Zotohem se do ta ndjek politikën e orientimeve pro-perëndimore, për paqe të qëndrueshme në rajon.

Vazhdojmë bashkë!
Për liri, për barazi, për demokraci.

/alsatm