Ku mbeti gjelbërimi në vendin tonë?! Nga Dr. Arbër Çeliku
Gjelbërimi është mushkëria e një vendi, ai është jeta vetë. Madje, edhe vendet islame, duke mos pasur sa duhet gjelbërim në tokat e tyre, ngjyrën e gjelbër e kanë simbol kombëtar dhe fetar.
Me të identifikohet dhe parajsa, e bukura, hyjnorja.
Neve Zoti na e ka falë gjelbërimin, ndërsa ne nuk dimë ta çmojmë këtë dhuratë hyjnore, më e keqja e përbuzim atë, e gjuajmë me shqelm.
Madje, partia që e trumbetoi me muaj të tërë atë politikisht në zgjedhjet e fundit (duke e gravuar edhe nëpër maica e patika si sihariqin e shekullit “diçka e madhe po vjen”), sot e ka harruar atë.
Asnjë hap për një ambient më të gjelbër. Ta proklamonin këta honxhobonxhot ordinerë, as që do të tundohesha t’i them dy fjalë, por kur e thotë i pari i partisë, ai që në një pjesë të popullit ende njihet për mbajtjen e fjalës së dhënë, lipset t’i biesh këmbanës.
Por, ja që del se ai ka talent mbase t’i thotë gjërat në një gjuhë që ne gjithsesi nuk e kuptojmë. Ne po përjetojmë një politikan tjetër nga ai që e kishim perceptuar, një politikan të pandershëm, një politikan që nuk e mban fjalën.
Mbase kjo dhe është detyra e një politikani, të premtojë gjëra që nuk mund t’i përmbushë. Të paktën, kjo quhet tashmë madhështi politike në konceptimin tonë.
Kerçova, sidomos rrethet, vendbanimet e ish komunës së Osllomesë me rreth 20 mijë banorë të regjistruar, u ngjajnë një Hiroshime: ajër kancerogjen, ku në TC Osllome me gjasë, përveç qymyrit të pafiltruar, digjen edhe mbetje të dyshimta, ngaqë çdo i dyti ka probleme me frymëmarrjen, çeramidat e shtëpive po rrjepen, bletët po shuhen, flora dhe fauna po vdesin.
Deponitë e egra vlojnë gjithandej, prerja masive e pyjeve po ashtu, në katastrofë ekologjike janë kthyer vendbanimet tona, tokat tona, vatani ynë.
Ku mbeti pra gjelbërimi i premtuar?! Smart-vendbanimet, smart-qytetet, smart-përrallat?!
Edhe sa duhet të vuajmë ne?!
Edhe sa duhet të tregtohet jeta jonë për përfitime të individëve të caktuar?!
Ndoshta sot jo, por një ditë me patjetër dikush të japë llogari.
/ms
