Dështimet, Putini shkarkon komandantët e lartë..
Rusia vazhdon sulmet e saj me raketa në qytetin e Bakhmut, në Donetsk, një qendër e rëndësishme për ushtrinë ukrainase.
Sot ka pasur një tjetër sulm ajror në Donetsk ku ende jetojnë rreth 20 mijë banorë, tha Pavlo Kyrylenko, kreu i administratës ushtarake rajonale.
Ai deklaroi se një ndërtesë pesë katëshe dhe një ndërtesë zyrash ishin goditur me raketa. Deri më tani janë shpëtuar 6 persona nga rrënojat. Ai u bën thirrje të gjithë atyre që kanë mundësi të largohen nga qyteti pasi asnjë vend nuk është i sigurt aty.
Ndërkohë sipas një raporti të inteligjencës britanike, Rusia po shkarkon komandantët e lartë për shkak të dështimeve në luftën e Ukrainës, shkruan BBC. Ushtria ruse dyshohet se ka nisur të përdorë armë me laser në Ukrainë, sipas një deklaratë të presidentit ukrainas Volodymyr Zelensky, i cili është shprehur se përdorimi i tyre tregon dështimin e plotë të Rusisë në Ukrainë.
“Sot, përfaqësuesit e shtetit rus thanë se pushtuesit kishin filluar të përdornin armë me lazer në Ukrainë në vend të raketave. Në propagandën naziste përdorej një term: armët e mrekullisë. Sa më e qartë bëhej se nuk kishin mundësi ta fitonin luftën, aq më shumë shtohej propaganda mbi një armë të mrekullueshme, e cila do të ishte aq e fuqishme sa do të shënonte kthesën në luftë.
Kështu po shohim se në muajin e tretë të luftës Rusia po përpiqet të gjejë armën e mrekullisë; e që na qenka lazeri. Kjo tregon qartë dështimin total të misionit,” tha Volodymyr Zelenski, president i Ukrainës.
Ndërkohë zëdhënësi i Ministrisë së Mbrojtjes ruse, Igor Konashenkov tha se gjithsej 1730 trupa ukrainase të strehuar në fabrikën e çelikut në Mariupol janë dorëzuar që nga e hëna.
Luftëtarët ukrainas që dolën nga fabrika e rrënuar e çelikut Azovstal pasi u urdhëruan nga ushtria e tyre të braktisnin kështjellën e fundit të rezistencës në qytetin port tashmë të rrafshuar, përballen me një fat të pasigurt. Ndërsa Ukraina tha se shpreson të kthejë ushtarët në një shkëmbim të burgosurish, Rusia kërcënoi se do t’i gjykonte disa prej tyre për krime lufte.
/alsatm
