Kërçovë: Pas 5 muajsh, MEPSO rregullon shtyllën mbi fshatin Tuhin..

Pas 5 muajsh, MEPSO ka arritur të rregullojë shtyllën e largpërçuesit mbi fshatin Tuhin në Kërçovë, përcjell TV21.

TV21 disa herë ka raportuar për mosfunksionimin e kësaj shtylle të largpërçuesit të rrymës elektrike. Dëmtimet ishin evidentuar qysh në dhjetor të vitit të kaluar.

“Është riparuar shtylla e dëmtuar e largpërçuesit 110 kV TS Samokov – TC Oslomej. Ekipet e departamentit të mirëmbajtjes së largpërçuesve në ShA MEPSO kanë bërë riparimin e shtyllës së dëmtuar të largpërçuesit 110 kV nr. 144 nga TS Samokov deri në TC Oslomej”, thonë nga MEPSO.

Nga MEPSO thonë se dëmtimi ishte bërë për shkak të reshjeve ndërkaq theksojnë se për riparim është dashur që të pritet përmirësimi i motit.

“Reshjet e dendura të borës , që përfshinë këtë rajon, kanë dëmtuar një shtyllë të vendosur në 1700 metra lartësi mbidetare. Me shkrirjen e borës u krijuan mundësi reale që ekipet profesionale të dalin në fushë dhe të riparojnë problemin.

Shtylla e rrëzuar është çmontuar dhe në vend të saj është vendosur një e re dhe atë është vendosur me dorë, sepse nuk ka mundësi që vinçi të hyjë në atë terren. I gjithë procesi ka zgjatur pesë ditë dhe nga dita e djeshme ky largpërçues 110 kV është vënë nën tension”, thonë nga MEPSO.

FOTO:

/tv21