Policia zvicerane ofron dhjetë mijë franga shpërblim për informata..

Më 3 nëntor 1999, në Schlieren të Zvicrës ishte vrarë një 20-vjeçar nga Maqedonia.
Për shkak të qasjeve të reja, Policia Kantonale e Cyrihut po rifillon hetimin dhe po ofron një shpërblim.

Mbrëmjen e së mërkurës, më 3 nëntor 1999, një person i panjohur ka qëlluar me armë zjarri një 20-vjeçar dhe shoqëruesin e tij 22-vjeçar në Schlieren.

Djaloshi ri u vra, ndërsa shoqëruesi i tij u plagos. Viktimat ishin që të dy shtetas të Maqedonisë së Veriut që jetonin në Kantonin Solothurn.

Atëbotë, u dyshua një shqiptar 18-vjeçar, shkruan në një komunikatë policia zvicerane. Ai u arrestua në Itali në fund të vitit 2000 dhe u ekstradua në Zvicër në vitin 2002, informon portali Shtegu. Çështja kundër tij u pushua në vitin 2003 për mungesë provash të mjaftueshme.

Hetimet e deritanishme kanë çuar në indicie për krime të ndryshme që dyshohet se janë kryer nga persona të afërt me të dyshuarin dhe viktimat.

Ekziston një supozim se personat e përfshirë dhe të intervistuar kanë fshehur qëllimisht informacione për autorët dhe motivin e tyre për të mos u inkriminuar.

Sot, me përjashtim të vrasjes, të gjitha veprat penale janë të parashkruara. Policia Kantonale e Cyrihut po rifillon hetimin dhe po ofron një shpërblim prej 10 000 frangash zvicerane për informacionin që mund të përdoret në gjykatë.

Thirrje për dëshmitarë:
Luten personat që kanë qenë të afërt me personat e përfshirë në atë kohë dhe që kanë njohuri për autorët dhe motivin e tyre, të kontaktojnë Policinë Kantonale të Cyrihut në +41 44 247 22 11.

Për informacionin që mund të përdoret në gjykatë për të identifikuar autorin e krimit, do të paguhet një shpërblim prej 10 000 frangash zvicerane.

/shtegu.com