Nga 1 marsi Itali liron masat për të hyrë në vend..

Nga data 1 mars, shtetasit e vendeve jashtë BE-së, kur të hyjnë në Itali do t’u nënshtrohen të njëjtave rregulla si qytetarët e BE-së.

Atyre do t’u duhet një certifikatë vaksinimi kundër koronës, një dëshmi e shërimit ose një test negativ të koronës. Kështu ka njoftuar Ministria e Shëndetësisë në Romë, raportojnë mediat italiane, transmeton srf.ch.

Kjo do të thotë që qytetarët jashtë BE-së nuk duhet të bëjnë më teste shtesë ose të përballen me karantinë të mundshme pesëditore nëse nuk janë në gjendje të tregojnë të gjitha dokumentet e nevojshme gjatë hyrjes.

Italia duket se me këtë hap dëshiron të tërheqë përsëri sa më shumë turistë të huaj, transmeton albinfo.ch.
Gjendja e jashtëzakonshme, e cila skadon më 31 mars, aktualisht është ende në fuqi. Pas kësaj, mund të pasojë një zbutje e mëtejshme e rregullave të koronës.

/albinfo