Gjermani, aksion i madh kundër puntorve pa letra !

Sipas njoftimit të Doganës Gjermane, të publikuar më 27 tetor, hetimet janë përqendruar ndaj katër personave të moshave 30 deri në 72 vjeç, mes të cilëve ndodhet edhe një person me shtetësi shqiptare dhe greke.

Operacioni është zhvilluar kryesisht në rajonin e Aschaffenburgut, në bashkëpunim ndërmjet Doganës, Policisë Kriminale dhe Prokurorisë së Würzburgut.Të dyshuarit, të lidhur me biznese të sektorit të montimit të skelave në ndërtimtari, po hetohen për mospagimin e kontributeve të sigurimeve shoqërore, lehtësimin e emigracionit të paligjshëm dhe mashtrimin ndaj fondit social të këtij sektori.

Sipas hetimeve paraprake, punëtorë kryesisht nga vendet e Evropës Juglindore dyshohet se ishin dërguar për të punuar në kompani të tjera ndërtimi pa autorizimet e nevojshme.Autoritetet dyshojnë gjithashtu se një pjesë e tyre nuk posedonin leje të vlefshme për të punuar në Gjermani.Gjatë kontrolleve, doganierët kanë gjetur edhe pesë punëtorë nga Evropa Juglindore, për të cilët dyshohet se qëndronin ilegalisht në territorin gjerman.

Në 17 objektet e kontrolluara janë sekuestruar prova të shumta, përfshirë kompjuterë dhe telefona mobilë, të cilët do të analizohen në kuadër të hetimeve.Autoritetet kanë zhvilluar gjithashtu intervistime me punëtorë të huaj për të sqaruar mënyrën e punësimit dhe kushtet në të cilat ata ushtronin veprimtarinë e tyre.

Dogana Gjermane ka bërë të ditur se vlera e dëmit të dyshuar financiar ende nuk mund të përcaktohet, për shkak të hetimeve në vazhdim.Në njoftimin zyrtar nuk raportohet për persona të arrestuar, ndërsa hetimet ndaj katër të dyshuarve po vazhdojnë nën drejtimin e Prokurorisë së Würzburgut.

/Urgjent