Shumica në Maqedoninë beson se COVID është krijuar për të kontrolluar njerëzit..
Pothuajse dy të tretat e qytetarëve në Maqedoninë e Veriut, besojnë se koronavirusi është krijuar për të kontrolluar njerëzit. Ky është rezultati i një studimi të sapo publikuar
Sipas sondazhit, rreth 65 për qind e të anketuarve mbështesin teorinë e pabazuar se COVID-19 është krijuar artificialisht në një laborator.
Një pjesë e madhe e njerëzve në Maqedoninë e Veriut gjithashtu besojnë në teori të tjera të pabazuara në lidhje me pandeminë: Rreth 46 për qind e të anketuarve besonin se virusi ishte spërkatur në ajër me ndihmën e aeroplanëve.
Dhe 44 për qind besojnë se Ministria e Shëndetësisë e ka rritur numrin e viktimave të COVID-19 sepse për këtë merr para.
Sondazhi u krye nga Instituti Societas Civilis për Demokraci (IDSCS) në bashkëpunim me Qendrën Presidenciale për Edukim Politik (PCPO).
Gazetari Bojan Stojkovski tha për Euronews se sondazhet “nuk ishin befasuese” dhe në përputhje me perceptimin e tij për shoqërinë, transmeton portali Shtegu.
Lajmet e rreme përhapen shpejt
“Ka shumë njerëz në Maqedoninë e Veriut që besojnë këto lloj teorish. Edhe nëse është e vështirë të imagjinohet”, tha ai.
“Rritja e lajmeve të rreme këtu është e dokumentuar mirë, por unë mendoj se pandemia e vendosi atë mbi të gjitha”.
Analiza e IDSCS zbuloi se qytetarët që janë të punësuar dhe kanë arsim të lartë, janë më pak të ndjeshëm ndaj teorive konspirative. Grupmosha 30 deri në 39 vjeç ka më pak gjasa të besojë pretendime të pavërtetuara.
Sipas analistëve, rritja e pretendimeve të pabazuara lidhet me mosbesimin e thellë ndaj politikanëve dhe institucioneve demokratike.
Stojkovski vuri në dukje edhe mungesën e llogaridhënies së qeverisë për zjarrin e fundit fatal në një spital COVID-19 në Tetovë.
“Teoritë e konspiracionit dhe mosbesimi ndaj autoriteteve – veçanërisht autoriteteve shëndetësore – janë të ndërlidhura”, tha ai për Euronews.
Sipas Our ëorld In Data, vetëm 37.9 për qind e të rriturve në Maqedoninë e Veriut janë plotësisht të vaksinuar kundër virusit. Norma është shumë nën mesataren e BE-së prej 68 për qind.
Në nëntor, qindra njerëz marshuan nëpër Shkup për të kundërshtuar masat e reja kufizuese dhe për të futur një kërkesë të mundshme vaksinimi për punonjësit e Qeverisë. Tregtia e certifikatave të falsifikuara të vaksinimit COVID-19 po lulëzon edhe në Maqedoninë e Veriut dhe në mbarë Europën Lindore.
“Autoritetet nuk kanë bërë përpjekje të mjaftueshme në një fushatë që shpjegon me fjalë të thjeshta se çfarë bën vaksina kundër Covid-it, si ju mbron dhe përfitimet që ajo ofron”, tha Stojkovski.
Populizmi në rritje ka qenë gjithashtu i lidhur me rritjen e teorive konspirative. Stojkovksi tha për Euronews se media sociale “luan një rol të madh në përhapjen e thashethemeve”.
“Në një ditë mesatare, mund të shihen qindra postime (të rreme) në lidhje me vaksinimet dhe virusin COVID”, tha ai.
“Veçanërisht me variantin e ri (Omikron), unë pres që fushatat e dezinformimit të përkeqësohen shumë. Na duheshin patjetër fushata më efikase dhe tani po përballemi me pasojat dhe po përpiqemi të kufizojmë dëmin”.
Sondazhi IDSCS tregoi gjithashtu se rreth 29 për qind e të anketuarve nuk besojnë në ndryshimet klimatike, ndërsa 46 për qind e të anketuarve besojnë se satelitë ose radarë të caktuar po kontrollojnë ndryshimet klimatike.
Sipas studimit, një shumicë prej 72 për qind gjithashtu besojnë se një pjesë e vogël e familjeve të fuqishme kontrollojnë botën.
Anketa është realizuar me 1 000 qytetarë mbi moshën 18 vjeçare në Maqedoninë e Veriut në maqedonisht, shqip dhe anglisht.
/shtegu.com
