Kryetari Pendarovski vizitoi Kërçovën (VIDEO)

Presidenti i Republikës së Maqedonisë së Veriut, Stevo Pendarovski, në kuadër të projektit “Ballë për ballë me presidentin”, sot qëndron për vizitë në Komunën e Kërçovës.

Në shkollën fillore “Sande Shterjovski”, Pendarovski vizitoi dy paralele, të cilët e përcjellin mësimin në gjuhën maqedonase, gjegjësisht në gjuhën shqipe.

Në këtë shkollë e përcjellin mësimin nxënës shqiptarë, maqedonas, turq dhe romë dhe është shembull për integrim ndëretnik në arsim. Gjithashtu, presidenti Pendarovski e vizitoi paralelen e fëmijëve me pengesa në zhvillim, të cilët mësojnë në shkollë.

Në bibliotekën e shkollës, presidenti Pendarovski u takua me 18 vjeçarin Albin Aliu, inovator, i cili ka bërë projekt për përpunim të letrave nga algat, të mbledhura në Liqenin e Ohrit. Ai e njoftoi presidentin Pendarovski me projektin e tij, me të cilin e ka fituar vendin e tretë në garën në Nju-Jork – SHBA, në fushën e biokimisë.

Në organizatën komunale të Kryqit të Kuq në Kërçovë, presidenti Pendarovski u takua me dr. Lulzim Jahoja, fitues i mirënjohjes nacionale për vullnetar të theksuar të vitit, për vitin 2019. Jahoja, i cili me profesion është neurolog, tashmë 15 vite është vullnetar në Kryqin e Kuq.

Gjatë qëndrimit në Komunën e Kërçovës, presidenti Pendarovski do të takohet me gazetarë nga mediat lokale, ndërsa do ta vizitojë edhe poçarin Stojan Stojanov, në fshatin Vraneshticë.

/tvgurra