BE-ja e mbështet vetëm me fjalë Maqedoninë.. (VIDE)
Liderët e vendeve anëtare në Bashkimin Evropian rikonfirmuan deklarativisht angazhimin e BE-së për integrimin e vendeve të Ballkanit Perëndimor në Union. Gjatë Samitit për Ballkanin Perëndimor në Bërno, funksionarët e lartë të BE-së thanë se gjashtë vendet e Ballkanit Perëndimor mbeten lartë në agjendën e Brukselit.
Presidentja e Komisionit Evropian Ursula von der Leyen tha se vendet e Ballkanit kanë dëshmuar përparim në reforma, por mbetet edhe shumë punë për tu bërë, sidomos në sferën e drejtësisë dhe lirinë e mediave.
Ursula von der Leyen, Presidente e Komisionit Evropian
“Ky është një samit i rëndësishëm me Ballkanin Perëndimor. Ne duam të përcjellim një mesazh të qartë dhe ky mesazh është që Ballkani Perëndimor përket në Bashkimin Evropian, ne i duam ata në Bashkimin Evropian dhe jemi një familje evropiane.
Gjashtë vendet e Ballkanit Perëndimor kanë ecur shumë përpara, kanë bërë përpjekje dhe reforma të mëdha. E di se duhet të bëhet akoma shumë punë si p.sh. në sundimin e ligjit, në sistemin e drejtësisë, në lirinë e mediave dhe të tjera. Mendoj se duhet të pranojmë përpjekjet që janë bërë në të kaluarën dhe progresin që është arritur”
Edhe komisari evropian për zgjerim dhe fqinjësi të mirë Oliver Varheji theksoi se Bashkimi Evropian duhet të marrë përgjegjësitë e veta dhe fjalët t’i shndërrojë në vepra.
Oliver Varheji, Komisar Evropian për Zgjerim
“Liderët tanë jo vetëm që do ta konfirmojnë, por do ta bëjnë gjithashtu shumë të qartë se jemi të përkushtuar për integrimin e plotë dhe anëtarësimin e vendeve të Ballkanit Perëndimor në BE. Prandaj, ne duhet të marrim përgjegjësitë dhe vendimet që na çojnë te kjo, që nënkupton hapjen e parë të konferencës ndërqeveritare me Maqedoninë e Veriut dhe Shqipërinë, hapjen e kapitujve me Serbinë, përshpejtimin e punës tonë që Bosnja dhe Hercegovina të bëhet vend kandidat për heqjen e vizave për kosovarët”
Në Samitin e sotëm në Slloveni nuk merren vendime për shtetet e Ballkanit Perëndimor, por diskutohet strategjia e mëtejme e Bashkimit Evropian ndaj rajonit, e cila në fund përfshihet edhe në Deklaratën e Samitit.
VIDEO:
/SHENJA/
