Shoqata “Uskana” USA letër ngushllimi për aktivistin Ismet Purellku

Ismet Purellku ishte një figurë shumë e kompletuar në rrafshin kombëtar e human.
Prej se ka ardhur në ShBA, veprimtaria e tij kurrë s’ka pushuar. Madje, në vitet ’90-ta të zhvillimeve dramatike në Kosovë ka qenë anëtar i LDK-së. Më pas bëhet edhe anëtar kryesie i Komunitetit Kërçovar e gjithshqiptar.

Nuk ka aksion e të mos ketë hedhur hap në të Ismet Purellku. Si njeri parimor e tepër i besueshëm kryen me përkushtim e përpikshmëri mbledhjen e 3%-shit për krizën dhe luftën në Kosovë. Bëhet pjesë e aksionit “Familja Mban Familjen”. Ishte donator i përhershëm financiar për luftën në Kosovë e Maqedoni.

Edhe në rrafshin e zhvillimit e të ngritjes së kulturës e organizimit të brendshëm të Kërçovarëve, ai mbetet si një prej themeluesve të Shoqatës “Kërçova”. Për gjatë kohë ka qenë edhe anëtar i kryesisë së saj. Ismet Purellku me bujarinë dhe dashurinë e flaktë kombëtare kurrë nuk kursehej për asgjë dhe e gjejmë edhe në ballë të ndihmave finansiare për lobim te zyrtarët e lartë të administratës amerikane.

Shkurt thënë, Ismet Purellku kishte tepër durim për të mos u zënë me askënd. Përkundrazi, me natyrën e thjeshtë e modeste ku përndritej karakteri i tij shembullor, ai shndërrohet në një legjendë e bërjes së punëve pa shumë fjalë e me saktësi. Ndaj dhe shpërngulja e tij në botën tjetër është një humbje tepër e madhe për komunitetin tonë shqiptaro-amerikan.

Atdhetarizmi dhe humanizmi i tij i pafund përbëjnë dy kryeveprat më njerëzore për të cilat e lusim Zotin ta ketë në mëshirën e Vet e ta shpërblejë në vendprehje të parajsës!
Ngushëllime familjes dhe miqve!
Lavdi veprës dhe jetës së tij plot gjurmë, por pa asnje njollë.