Rrëfehet gazetari Syla: Më kapi për dore dhe më tha ‘a bën ti kurrë mos me fol’..

Gazetari Valon Syla ka thënë se sulmi fizik ndaj tij ndërlidhet me kritikat e tij për diasporën.
Drejtori i portalit “Metro” ka deklaruar se sulmi fizik ndaj tij është një akt primitiv, i cili sipas Sylës, vërteton kritikat e tij për komunitetin e diasporës.

Në lidhje me sulmin, i cili ndodhi paraditën e sotme, Syla ka deklaruar se i dyshuari, i cili sipas tij është vëllai i një zyrtari të Partisë Demokratike të Kosovës, shoqërohej nga dy persona të tjerë në momentin e sulmit.

“Kanë qenë tre persona, por dy prej tyre kanë qëndruar indiferent. Aty ka shumë kamera dhe shumë pjesë që kanë mundur ta regjistrojnë dhunën ndaj meje. Policia i ka marr këto pamje, ashtu sikurse deklaratat dhe e ka proceduar rastin”, ka thënë Syla.

Syla ka thënë se ka insistuar vazhdimisht të tërhiqej nga sulmuesi i tij, teksa ka treguar momentet e sulmit dhe komunikimin që kishte me të.

“Mu drejtua ‘a je Valoni ti?’, teksa unë isha në bankë aty për ta kryer një pagesë. Unë i thash ‘jo nuk jam’. Më kapi për dore dhe më tha ‘a bën ti kurrë mos me fol dhe kurrë mos me dal në televizion’. U mundova të tërhiqem, e kam shtyrë dhe jam larguar”, ka thënë Syla.

Gazetari Syla ka deklaruar se i dyshuari për sulmin ndaj tij është vëllai i një zyrtari të lartë të PDK-së.

“Personi është vëllai i një zyrtari të lartë të PDK-së, të cilin nuk e njoh më heret por me aq sa di edhe vëllai i tij në një koment, edhe ai ka qenë pjesë e këtij linçimi publik që më është bërë mua. Këtë e kam mësuar pas sulmit”, ka thënë Syla.

Gazetari Syla u sulmua fizikisht paraditen e së martës në lagjen “Pejton” të Prishtinës. Sulmi është inciziuar nga kalimtarë të rastit. Pamjet shfaqin gazetarin Syla të sulmuar me grushte nga një person.

I dyshuari është vetdorëzuar sot në Policinë e Kosovës, ka bërë të ditur për Insajderi, Bajram Krasniqi, zëdhënësi i policisë.

Sulmuesi, siç kanë raportuar sot mediat, dyshohet të jetë Bashkim Jupa, një mërgimtar me qëndrim në Zvicër.

/Insajderi.org