Spitali i Kërçovës ndërtimi i objektit që thyen rekordet për mosmbajtje të premtimeve (FOTO)

Spitali i Kërçovës funksionon i shkapërderdhur nëpër disa objekte të ndryshme në qytetin e Kërçovës e të ndara në reparte. Ndërtimi i një objekti të ri dhe të përshtatshëm është nevojë imediate për qytetarët e këtij vendbanimi, shkruan in7.

Ndërtimi i këtij objekti kishte filluar qysh para dy dekadave, respektivisht që nga viti 1989/90.

Këtë mision ja dha vetes edhe Bashkimi Demokratik për Integrim, e cila shumë herë kishte premtuar realizimin e këtij projekti.

Si projekt kapital premtohet në Platformën promovuese, në zgjedhjet e vitit 2014 (shiko Platformën, faqe 290/3) duke dhënë si afat të fundit për përfundimin e punimeve vitin 2015. Por edhe në Platformën promovuese në zgjedhjet e vitit 2016 gjithashtu llogaritet si projekt kapital i kësaj partie, e ky premtim deri më tani ( 29 Tetor 2019) ende është i parealizuar, shkruan in7.

Që nga viti 1985 e deri në vitin 2013, Spitali i përgjithshëm i Kërçovës vazhdoi të mbetet në gjendje të mjerueshme. Në këtë vit Qeveria e RMV-së mori vendimin që të fillojë një operacion të madh investues në objektin e këtij spitali. Sipas ministrit të shëndetësisë, punimet ndërtimore duhej të përfundonin në afat prej 18 muajsh (që i binte diku në shator 2014 të përfundonte).

Njoftimin për ndërtimin e objektit të ri që do të kushtojë rreth 3.7 milion euro, e bëri Ministri i atëhershëm i shëndetësisë, Nikolla Todorov, gjatë një vizite në Kërçovë.

“Në pajtim me dinamikën e cila u përcaktua në seancën e Qeverisë, tenderi i ndërtimit duhet që të shpallet në mesin e qershorit ndërsa punët e ndërtimit duhet që të fillojnë në gusht dhe të gjitha të përfundojnë në një afat prej 18 muajve”, kishte deklaruar atë kohë Ministri i atëhershëm i Shëndetësisë, Nikolla Todorov nga rradhët e VMRO-DPMNE-së, (në vitin 2013).

Përkundër kësaj, ky premtim nuk arriti në ndonjë hap konkret. Spitali i Kërçovës edhe pas tre muajve vazhdonte të përballet me vështirësi të shumta. Drejtori i këtij spitali, ripohoi se kushtet janë të vështira.

“Reparti i sëmundjeve interne, reparti i gjinekologjisë, reparti i akusherisë, kanë kushte të kënaqshme, janë të vendosur në objekte pak më të reja dhe disponojnë me disa aparatura të reja dhe modern.

Sa i takon pjesës së ambulancave, urgjencës, infektives dhe urologjia kanë kushte shumë larg të kënaqshmes, lirisht mund të them, kushte të këqija. Spitali ka nevojë për kushte më të mira të cilat ne shpresojmë se do t’i kemi kur të transferohemi në objektin e ri”, kishte deklaruar derjtori i atëhershëm i spitalit të Kërçovës, Lupçe Risteski (2013)

As edhe në afatin e paraparë për përfundimin e punimeve (shtator 2014) nuk u arrit në ndonjë përfundim konkret. Në fund të vitit 2015, një delegacion i Bashkimi Demokratik për Integrim (BDI), i udhëhequr nga Sekretari i atëhershëm shtetëror i Ministrisë së Shëndetësisë, Nasuf Ipçja, viziton Spitalin e Kërçovës, ku njihet me procesin e punës së këtij spitali dhe zhvillimin e tij në planin infrastrukturor, kadrovik dhe organizativ. Nasuf Ipçja vazhdoi me premtimin se Spitali do të jetë gati në vitin 2017.

“Duke u bazuar në dinamikën e zhvillimit të punimeve, të dyja fazat e projektit për ndërtimin e objektit të ri të spitalit të Kërçovës, do të përfundojnë më vitin 2017. Ndërtimi i këtij objekti të filluar para shumë vitesh, do të zgjidhë problemet hapësinore dhe ato higjienike në qendrën spitalore të Kërçovë”,kishte thënë Sekretari i atëhershëm shtetëror i Ministrisë së Shëndetësisë, Nasuf Ipçja, në televizionin lokal tv Uskana (2015)

Edhe për vitin 2016 nuk pati ndonjë hap pozitiv drejt realizimit të projektit shumëvjeçarë, pavarësisht që punimet kishin arritur përfundimin e fazës së parë të projektit. Përveç problemit me hapësirën, spitali vazhdonte të ketë probleme nga më të ndryshmet.

“Tani ju jeni të vetëdijshëm dhe e keni pa se spitali i Kërçovës është ndërtuar që në vitin 89/90 nuk do, edhe tash jeni dëshmitarë të asaj që duket, është në pjesën përfundimtare, në përfundim të fazës së parë të projektit për ringjallje. Tash jemi në fazën e dytë, dhe shpresoj se brenda vitit 2017 të mbarojnë punët, pasi që kështu është paraparë në Programin e Ministrisë së Shëndetësisë”, kishte deklaruar Nasuf Ipçja, Sekretar I atëhershëm shtetëror në Ministrinë e Shëndetësisë në televizionin lokal, Tv Gurra (2016), përcjell in7.

Hapësirat e reja spitalore kanë nisur të ndërtohen para më shumë se dy dekadave, por prej vitit 1989-90 kjo nismë asnjëherë nuk arriti të përfundohet. Projekti u miratua nga Qeveria e RMV-së dhe u ndanë mjete në vlerë prej 3.7 milion euro dukeprojektuar që viti 2014 të jetë afati i fundit për përfundimin e punimeve. Deri në këtë vit, objekti nuk u ndërtua. Projekti u premtua edhe nga BDI, kësaj radhe duke përcaktuar vitin 2015 për përfundimin e punimeve, mirëpo as kjo nuk u bë realitet.

Edhe pse afati i përcaktuar në Platformë ka skaduar, së fundi si afat për finalizim të punimeve nga ana e BDI-së u caktua viti 2017. Por edhe ky afat dështoi duke prodhuar edhe një afat tjetër për finalizim të punimeve në këtë spital, e që ishte si projekt i premtuar në Platformën zgjedhore të BDI-së në vitin 2016-2020, por si duket ky premtim do të ketë hapësirë edhe në platformën zgjedhore të BDI-së edhe në zgjedhjet e 12 Prillit të 2020.

Edhe Ministri aktual i Shëndetësisë, Venko Filipçe, në përgjigjen e pyetjes së in7 se deri ku janë punimet për objektin e ri të Spitalit të Kërçovës, u përgjigj njëjtë si edhe të tjerët, se ka përfunduar faza e parë dhe se tani po bëhen përgatitje që punimet të fillojnë edhe në fazën e dytë, por pa caktuar se deri kur do të shkojë kjo golgotë.

Kështu që, këtë premtim të BDI-së, në dy cikle zgjedhore, mund ta vlerësojmë si të PAREALIZUAR. /in7.tv/

Më poshtë keni fotografi të shkrepura nga gjendja aktuale e ndërtesës së spitalit të Kërçovës: