Vazhdon protesta e gjimnazistëve të Kërçovës, kërkojnë mësim me prani fizike (VIDEO)
Nxënësit e Gjimnazit “Drita” të Kërçovës, protestuan për të dytën ditë me radhë. Marshi filloi nga qendra e qytetit dhe përfundoi para komunës së Kërçovës.
Ata kërkojnë të fillojnë mësimin me prani fizike e jo me mësim online.
“Në vazhdojmë të jemi të mendimit se ne duhet të jemi në shkollë, të fillojmë shkollën me prezencë fizike, siç thash edhe dje efektive nuk është aspak mësimi online. E provuam nuk është efektiv dhe vazhdojmë të protestojmë”, tha një nxënëse.
“Do të vazhdojmë të kërkojmë të drejtat tona besoj që mësimi online nuk është efektiv, siç theksuan edhe kryetari edhe nxënësja. Do të vazhdojmë me protestën do të kërkojmë përkrahje e të gjithë nxënësve pa marrë parasysh përkatësinë etnike, racën apo gjininë”, shtoi një nxënës tjetër.
Para komunës së Kërçovës nxënësit i priti Kryetari i kësaj Komunë Fatmir Dehari. Ai tha se nga dita e parë ka marrë qëndrim që t’i mbështesë prindërit dhe nxënësit për mësim me prani fizike, gjithmonë duke respektuar protokollet.
“Tani dola për t’i dëgjuar edhe një herë nxënësit nga afër për kërkesat e tyre dhe njëkohësisht ndamë mendimin që bazuar në argumente që ka shkolla e mesme Drita në këtë rast edhe Mirko Mileski në qoftë se shfaqin interes në këtë rast nxënësit dhe prindërit për të vazhduar insistuar në kërkesat tona duke ja ofruar MASH të gjitha argumentet dhe komisionit për sëmundje infektive se mundet viti i parë dhe viti i katër në kombinim me dy ndërrime të zhvillojnë procesin edukativo arsimorë në mënyrë të drejtpërdrejtë”, deklaroi Fatmir Dehari – Kryetar i Komunës së Kërçovës.
Protestat e nxënësve të Gjimnazit “Drita” do të vazhdojnë edhe më tej, siç thanë, deri në realizimin e kërkesave të tyre për mësim me prezencë fizike.
VIDEO:
/tv21
