Kërçovë: Universiteti i Punëtorëve “Kërste Misirkov” kërkon punësime të reja

Në seancën e 37-të të Këshillit të Komunës së Kërçovës si pikë të veçantë të rendit të ditës ishte kërkesa e Institucionit Komunal Universiteti i Punëtorëve “Kërste Misirkov” për dhënin e mendimit pozitiv për planin e tyre vjetor për punësim në këtë institucion.

“Një periudhë të gjatë ne kërkojmë pëlqim për punësimin e të paktën edhe katër personave të cilët duhet të punojnë në institucionin tonë”, tha u.d. drejtoresh e Universitetit të Punëtorëve “Kërste Misirkov” në Kërçovë, Aneta Gjorgjioska.

Theksoi se njëzëri në Këshillin e komunës kanë marrë dritë të gjelbër për propozim vendimin për dhënien e pëlqimit të planit vjetor për punësim në institucionin tonë, por paraprakisht nuk kanë marrë pëlqim nga Ministria e Financave.

“Këtë herë shpresojmë se do ta marrim këtë pëlqim të nevojshëm dhe do të arrijmë t’i plotësojmë këto vende pune të cilat kanë mbetur të zbrazura për shkak të pensionimit të të punësuarve të mëparshëm. Përndryshe për momentin në këtë institucion punojmë vetëm dy”, shtoi Gjorgjioska.

/ts