Deputetët e ASH-AAA “JO” votë për Talat Xhaferin

Deputetët e koalicionit ASH-AAA nuk do të votojnë kryetarin e Kuvendit, Talat Xhaferi që është pjesë e marrëveshjes për bashkëqeverisje midis LSDM dhe BDI.

Deputetët e koalicionit opozitar Syrija Rashidi dhe Skender Rexhepi theksuan se nuk do të lejojnë të shkelet vullneti i qytetarëve i shprehur në zgjedhjet e fundit, duke aluduar se nuk do ta mbështesin kandidatin e propozuar për kryeparlamentar, Talat Xhaferi, përcjell INA.

“Si koalicion nuk do të lejojmë që të shkelim mbi vullnetin e 82 mijë votuesve dhe të atyre që e kanë akuzuar BDI-në për vjedhje. Nuk do të lejojmë që të shkelet gjithë ky vullnet I shqiptarëve, të cilin e mohuan Talat Xhaferi dhe Ali Ahmeti”, tha Skender Rexhepi.

Për zgjedhjen e Xhaferit do të duhen 61 deputetë, ndërsa shumica parlamentare numëron 62 deputetë. Deputetët e koalicionit ASH-AAA pritet të braktisin punimet e Kuvendit gjatë procesit të votimit të Xhaferit.

/(INA)