Bota zgjodhi Gjermaninë si vendin më të pëlqyer
Gjermania e ka zënë vendin e parë në një sondazh për “vendet më të admiruara” në botë, duke e lënë SHBA-në larg të dytën, dhe Kinën e Rusinë të tretën, respektivisht të katërtën.
Sondazhi vjetor i kryer nga “Gallup” tregoi se Gjermania zë këtë vend për të tretin vjet radhazi, duke e lënë SHBA-në prapa për 10 pikë të përqindjes”, ka raportuar “The Guardian”.
Vendi evropian kishte shkallë të pranueshmërisë me 44%, ndërsa SHBA-ja me 33%. Kina ishte një pikë prapa SHBA-së, me 32%, ndërsa Rusia e katërta me tri pikë të përqindjes prapa SHBA-së, transmeton Zeri.info.
Sipas “The New York Times”, vlerësimet për SHBA-në janë më të ulëtat në raport me aleatët evropianë, ku 61% e kundërshtojnë lidershipin amerikan dhe vetëm 24% e përkrahin. Tri vendet evropiane që i dhanë vlerësime pozitive SHBA-së ishin Kosova, Shqipëria dhe Polonia.
Sondazhi me nga 1 mijë të rinj në 135 vende u zhvillua më 2019, para se bota të prekej nga koronavirusi. Megjithatë, beteja e suksesshme e Gjermanisë me pandeminë me gjatë vetëm sa e ka forcuar imazhin e saj si fuqi e qëndrueshme globale.
“Kancelarja gjermane, në këtë post për kohë të gjatë, Angela Merkel, e deshën apo e urryen, ka qenë një prej liderëve më të parashikueshëm në periudha shumë të paparashikueshme si në Evropë ashtu edhe në rendin global”, ka thënë kryeredaktori i “Gallup”-it, Mohamed Younis.
Pozicioni global i SHBA-së do të “vë dyshime” ndaj pretendimeve të Sekretarit të shtetit amerikan, Mike Pompeo, i cili javën e kaluar i tha Reutersit se vendi është “i pozicionuar në mënyrë të përkryer” për ta drejtuar botën e lirë kundër Partisë Komuniste të Kinës.
Gjatë administratës Obama, SHBA-ja ishte në vendin e parë të sondazhit të “Gallup”-it çdo vit, por popullariteti i saj ndërkombëtar ka rënë për 18 për qind me ardhjen e Trumpit në pozitë.
Ballafaqimi i presidentit amerikan me pandeminë, që deri më tani e ka goditur vendin më shumë se çdo vend tjetër për sa u përket vdekjeve, mund ta dëmtojë edhe më shumë pozicionimin e SHBA-së.
Politikat proteksioniste ekonomike të Trumpit dhe tërheqja nga disa traktate dhe organizata ndërkombëtare mund të jenë po ashtu faktor për rënien kaq të madhe në vlerësime, ka thënë “Gallup”-i.
Kina doli para SHBA-së më 2018, por është kritikuar për “diplomacinë vazhdimisht e më agresive”, raporton “The New York Times”. Raportet me Britaninë kanë vazhduar të përkeqësohen për shkak të përfshirjes së kompanisë kineze Huawei në rrjetin 5G në Britani, shkroi “Financial Times”.
/lajmpress
