Austri, 47-vjeçari nga Kosova dënohet me burgim të përjetshëm për vrasjen e gruas !

Austri, 47-vjeçari nga Kosova dënohet me burgim të përjetshëm për vrasjen e gruas !

Gjykata Rajonale në Wiener Neustadt të Austrisë ka dënuar me burgim të përjetshëm një 47-vjeçar nga Kosova, i cili vrau bashkëshorten e tij 38-vjeçare, nënë e katër fëmijëve. Vendimi nuk është ende i formës së prerë.


Ngjarja e rëndë kishte ndodhur më 5 prill 2026, ditën e Pashkëve, kur 47-vjeçari kishte shkuar në banesën e bashkëshortes, me të cilën jetonte i ndarë, për t’u dërguar dhurata katër fëmijëve të tyre.

Sipas aktakuzës, pasi kishte lënë dhuratat, ai kishte qëlluar tri herë me armë zjarri ndaj 38-vjeçares dhe më pas e kishte goditur rreth 40 herë me kaçavidë. Pas vrasjes, trupin e viktimës e kishte fshehur në kopsht, nën mbeturina bimore.


Teksa përpiqej të pastronte gjurmët e krimit, ai ishte befasuar nga djali i tij 13-vjeçar. Më pas, 47-vjeçari kishte kontaktuar vetë policinë, e cila e kishte arrestuar.

Gjatë procesit gjyqësor, i akuzuari kishte pranuar veprimet e tij, por kishte pretenduar se kishte vepruar në vetëmbrojtje.
Eksperti psikiatrik Manfred Walzl kishte konstatuar se 47-vjeçari vuante nga një çrregullim i rëndë i personalitetit, por se ishte penalisht i përgjegjshëm për veprimet e kryera.

Përveç dënimit me burgim të përjetshëm, gjykata ka urdhëruar edhe vendosjen e tij në një institucion psikiatrik mjekoligjor, për shkak të rrezikut të përsëritjes së dhunës.

Ndërkohë, personi i dytë i akuzuar, i cili dyshohej se kishte siguruar armën e përdorur në vrasje, është liruar nga akuzat.
Të dy vendimet nuk janë ende të formës së prerë.
Rasti ka lënë pas katër fëmijë që kanë humbur nënën e tyre në rrethana tragjike.

/ms

 




>