Dy vëllezër shqiptarë nga Kërçova që po lënë gjurmë në Zvicër!
Ilir dhe Lirim Elezi, dy vëllezër me prejardhje nga Kërçova, kanë hapur në zemër të qytetit Biel/Bienne restorantin Ristorante Focacceria FOCCA, duke ndërthurur përvojën në hoteleri me gastronominë italiane dhe mikpritjen shqiptare.
Në rrëfimin e tyre për Kërçova Net, vëllezërit Elezi tregojnë se pas këtij projekti qëndrojnë 21 vite përvojë në hoteleri dhe gastronomi, kualifikime profesionale dhe angazhime në drejtimin e hoteleve luksoze me katër dhe pesë yje. Njohuritë e fituara gjatë kësaj rruge, thonë ata, tashmë i kanë sjellë në restorantin e tyre në Zvicër.
FOCCA ndodhet në Marktgasse 3, në një ambient që, sipas vëllezërve, ka strehuar një nga restorantet më të vjetra të qytetit. Pikturat murale historike dhe tarraca e gjerë i japin hapësirës një karakter të veçantë, ndërsa oferta gastronomike përqendrohet te specialitetet italiane, veçanërisht Pinsa Romana dhe Focaccia.
“Synimi ynë ka qenë të krijojmë një vend ku eleganca, historia, mikpritja dhe gastronomia italiane bashkohen”, shprehen ata.
Një vend të rëndësishëm në këtë projekt zë edhe bashkëpunimi me klubin zviceran të hokejit EHC Biel. Vëllezërit tregojnë se në restorant kanë krijuar një hapësirë me autografet e ekipit, të mbrojtura me pleksiglas si kujtim i përhershëm. Gjithashtu, sipas tyre, tarraca është vënë në dispozicion të një aktiviteti të lidhur me klubin.
Iliri dhe Lirimi thonë se pritja nga komuniteti lokal ka qenë shumë pozitive. Sipas tyre, qytetarë, përfaqësues politikë dhe punonjës të institucioneve publike kanë shprehur vlerësime për projektin.
Megjithatë, një emocion të veçantë u sjell mbështetja e bashkatdhetarëve shqiptarë, sidomos atyre nga Kërçova, të cilët e ndjekin me krenari rrugëtimin e tyre.
“Për ne, suksesi nuk është vetëm hapja e një restoranti, por edhe përfaqësimi me dinjitet i prejardhjes sonë shqiptare në Zvicër”, theksojnë vëllezërit Elezi.
Përmes FOCCA-s, dy vëllezërit kërçovarë po ndërtojnë një kapitull të ri të rrugëtimit të tyre profesional, duke ruajtur lidhjen me rrënjët dhe duke sjellë përvojën e tyre në jetën gastronomike të Bielit.
📍 Ristorante Focacceria FOCCA
Marktgasse 3, 2502 Biel/Bienne, Zvicër
/kercova.net
