Fjalimi i Kryetarit të Xhamisë Kërçova Enver Ibraimi (VIDEO)

Selamu alejkum! Paqja dhe mëshira e Zotit qofshin mbi ju!
Të nderuar anëtarë të Kryesisë së Xhamisë Kërçova, të nderuar anëtarë të Komisionit Zgjedhor, të dashur anëtarë të xhamisë dhe bashkëvendës kërçovarë, kudo që ndodheni, të nderuar përfaqësues të mediave, TV Uskana dhe TV Gurra, si dhe të gjithë ju që na ndiqni drejtpërdrejt përmes Facebook-ut dhe rrjeteve sociale, ju përshëndes përzemërsisht të gjithëve dhe ju falënderoj për vëmendjen dhe interesimin tuaj.
Dua ta nis këtë fjalim me një fjali të thjeshtë, por që përmbledh shumë nga ajo që kemi kaluar ndër vite: Asgjë nuk lihet prej qejfi, por asnjë përgjegjësi nuk mund të mbahet pa besim, pa mbështetje dhe pa mundësinë për të punuar.
Që nga viti 2016, kemi kaluar së bashku nëpër shumë sfida. Kemi investuar kohë, energji, mjete dhe mund personal.
Kemi marrë vendime të vështira, kemi përballuar situata të ndërlikuara dhe kemi mbajtur përgjegjësi edhe në momentet kur nuk ka qenë aspak e lehtë.

Sot, rezultatet e kësaj pune janë të dukshme. Kemi ndërtuar dhe zhvilluar një institucion që u shërben kërçovarëve, një xhami me funksionet e saj, hapësira për burra dhe gra, ambiente për aktivitete dhe një bazë financiare të krijuar ndër vite.

Këto arritje nuk janë meritë e një personi të vetëm. Janë rezultat i kontributit të shumë njerëzve që kanë besuar te kjo xhami dhe kanë dhënë nga vetja për të.
Prandaj, dua t’i falënderoj sinqerisht të gjithë ata që kanë kontribuar, që na kanë mbështetur dhe që kanë qëndruar pranë nesh. Falënderoj edhe ata që, me fjalët dhe veprat e tyre, na kanë dhënë forcë të vazhdojmë.
Kontributi i atyre që punojnë për të mirën e xhamisë nuk harrohet.
Të nderuar vëllezër,
Do të ishte e lehtë të flisnim vetëm për arritjet, por përgjegjësia kërkon të flasim edhe për vështirësitë.

Gjatë këtij udhëtimi kemi pasur mendime të ndryshme, kundërshtime dhe mospajtime. Kjo është normale. Nuk kërkojmë që të gjithë të mendojnë njësoj. Por ajo që kemi kërkuar është që mendimet e ndryshme të shprehen me respekt, me argumente dhe me qëllime të mira.
Ajo që kemi kërkuar ka qenë që kritikat t’i dëgjojmë dhe t’i vlerësojmë, që ato të shprehen në diskutime dhe të mos shndërrohen në thashetheme, keqkuptime dhe përçarje.
Nuk mund të kërkohet përgjegjësi nga kryesia, ndërsa vetë të largohemi prej saj. Dhe nuk mund të lejojmë që interesat personale të vendosen mbi interesin e xhamisë.
Ne nuk ishim këtu për t’i kënaqur të gjithë, por për të bërë punën që na është besuar.

Nuk mund të mbash përgjegjësi për një institucion dhe, në të njëjtën kohë, të të pengohet puna në çdo hap. Përgjegjësia duhet të shoqërohet me besim dhe me mundësi reale për të vepruar brenda rregullave.
Dhe kur kam thënë se punoj për 100 vitet e ardhshme, e kam fjalën për një institucion të qëndrueshëm, që do t’u shërbejë fëmijëve tanë dhe brezave që do të vijnë pas nesh.
Nuk duhet të mendojmë vetëm për atë që kemi sot, por edhe për atë që do t’i bëjë mirë xhamisë nesër.

Të nderuar anëtarë dhe vëllezër kërçovarë,
Pasi na përfundoi mandati, u mbajtën zgjedhjet dhe, siç e patë, nuk kishte kandidat. Komisioni Zgjedhor propozoi një kërkesë me nënshkrime nga anëtarët, drejtuar neve, që të vazhdojmë edhe një mandat.

Andaj, ne e kemi vlerësuar këtë kërkesë me seriozitet dhe ju jemi mirënjohës për besimin që na keni dhënë, duke shprehur vullnetin tuaj edhe përmes nënshkrimeve që ne të vazhdojmë.
Pas reflektimit, diskutimeve dhe konsultimeve me kryesinë, i kemi shqyrtuar dhe analizuar të gjitha gjërat. Nëse do të ishte fjala për interesin personal, as këtë fjalim nuk do ta mbanim.
Sepse, ashtu siç askush nuk pranoi të merrte përgjegjësinë, të paktën ne jemi më pak me faj, sepse për 10 vjet e kemi mbajtur një përgjegjësi, pavarësisht çdo sakrifice, mundi dhe thashethemesh që janë bërë për ne.

Dhe këtu, pavarësisht se sa të vështirë mund të na e bëjnë ata që nuk ia duan të mirën kësaj xhamie, ne kemi një qëllim që është shumë më i madh se të gjithë ata.
Ai qëllim është ta ruajmë këtë xhami për fëmijët tanë.
Andaj, sot dua t’ju njoftoj se kemi vendosur ta vazhdojmë mandatin dhe të marrim përsipër edhe një herë përgjegjësinë për drejtimin e Xhamisë Kërçova.

Ky vendim nuk është marrë për një titull, për një karrige apo për të kënaqur ndonjë njeri. Është marrë sepse besojmë te puna që kemi bërë, te ajo që kemi ndërtuar dhe te përgjegjësia që kemi për të ndarë së bashku.

E dimë se rruga përpara nuk do të jetë pa sfida. Nuk premtojmë se nuk do të bëjmë gabime, por premtojmë se do të vazhdojmë të punojmë me seriozitet, të mbajmë përgjegjësi dhe të bëjmë çmos që Xhamia Kërçova të ecë përpara.

Besimin tuaj nuk e konsiderojmë privilegj, por përgjegjësi. Dhe këtë përgjegjësi jemi të gatshëm ta mbajmë me vendosmëri, përkushtim dhe me interesin e xhamisë mbi çdo interes tjetër.
Mandati vazhdon. Puna vazhdon. Dhe përgjegjësia vazhdon.
Ju falënderoj të gjithëve për mbështetjen, besimin dhe kontributin tuaj.
Ju falënderoj për vëmendjen.
Selamu alejkum!

VIDEO:

/ms