Policët për 2500 eurot e premtuara nga Rama rrahin brutalisht stidentët!

Në Tiranë vijon protesta e të rinjve, e cila, në ditën e saj të shtatë, ka si kërkesë kryesore dorëheqjen e qeverisë dhe të kryeministrit Edi Rama. Pas disa orësh qetësi, tensionet janë rikthyer sërish mes protestuesve dhe Policisë së Shtetit, në zonën pranë sheshit Skënderbej.

Protestuesit kanë hedhur fishekzjarrë dhe kapsolla, ndërsa policia është përgjigjur me gaz lotsjellës. Më pas, disa prej protestuesve u kanë vënë flakën koshave të mbeturinave, ndërsa efektivët kanë përdorur ujë me presion për të shpërndarë turmën.

Përplasjet e fundit vijnë pas një dite të shoqëruar me tensione, gjatë së cilës protestuesit sulmuan edhe Gjykatën e Apelit, ku u kryen disa shoqërime nga policia.

Ndërkohë, grumbullime protestuesish janë shënuar edhe në disa qytete të vendit, përfshirë Lezhën, Vlorën, Elbasanin dhe Shkodrën. Një pjesë e gjimnazistëve dhe studentëve kanë bojkotuar mësimin dhe kanë marshuar në rrugët e qyteteve, duke iu bashkuar protestave që vijojnë prej shtatë ditësh.

Për situatën në Tiranë kanë reaguar edhe kryetari i Delegacionit të Parlamentit Evropian për marrëdhëniet me Shqipërinë, Marco Tarquinio, dhe raportuesi i përhershëm për Shqipërinë, Andreas Schieder. Ata kanë dënuar dhunën, sulmet ndaj institucioneve dhe shkatërrimin e pronës, ndërsa kanë kërkuar hetim për raportimet mbi përdorimin e tepruar të forcës nga policia.

Më herët gjatë ditës, kryeministri Edi Rama zhvilloi një konferencë për mediat së bashku me ministrin e Brendshëm, Ervin Demo, ku dënoi aktet e dhunës ndaj forcave të rendit. Rama njoftoi se nga 1 janari do të ketë rritje të konsiderueshme të pagave të punonjësve të policisë, si dhe mbështetje financiare prej 2 500 eurosh për çdo efektiv të angazhuar në front.

Kreu i qeverisë deklaroi se mbetet i hapur për dialog me të rinjtë, por jo me ata që, sipas tij, bëhen pjesë e dhunës. Nga ana tjetër, ministri i Brendshëm, Ervin Demo, deklaroi se situata ka kaluar vijën e kuqe, duke argumentuar se personat e përfshirë në aktet e dhunës nuk përfaqësojnë studentët dhe se protesta nuk mund të konsiderohet më një protestë studentore.

Pavarësisht disa orëve qetësi, situata pranë sheshit Skënderbej është tensionuar sërish, ndërsa protestat vijojnë në Tiranë dhe në qytete të tjera të vendit.

/euronews