Alarm në Bullgari: Dronët godasin tre anije në Detin e Zi, njëra fundoset !

Kryeministri bullgar, Rumen Radev, njoftoi se janë regjistruar sulme të reja me dronë ndaj anijeve në Detin e Zi, duke i cilësuar si „absolutisht të papranueshme“ sulmet në afërsi të ujërave territoriale të Bullgarisë.

Radev bëri të ditur se është thirrur një mbledhje urgjente e Këshillit të Sigurisë pranë qeverisë bullgare, gjatë së cilës u raportua edhe për një anije tjetër të goditur, 17 milje detare në lindje të Krapecit. Anija u fundos, ndërsa një anëtar i ekuipazhit u shpëtua.

Më herët, rreth orës 01:30 pas mesnate, ishte pranuar një thirrje për ndihmë nga një anije që ndodhej 18 milje detare në lindje të Bjalës. Sipas të dhënave të përcjella nga ekuipazhi në Qendrën e Shpëtimit Detar në Varna, anija ishte goditur nga tre dronë ajrorë në kuvertë dhe në pjesën anësore, raportoi agjencia BTA.

Shërbimet bullgare të shpëtimit dhe pjesëtarët e policisë kufitare evakuuan të 15 anëtarët e ekuipazhit të anijes „Chelsea 3“, e cila lundronte nën flamurin e Maltës, ishte e regjistruar në Odesa dhe ishte në pronësi të Ukrainës. Ekuipazhi përbëhej nga shtatë shtetas ukrainas dhe tetë shtetas azerbajxhanas.

Sipas Radevit, ekuipazhi u dërgua në portin e Varnës, ndërsa pesë anëtarë morën ndihmë mjekësore për lëndime të lehta.

Kryeministri bullgar deklaroi se përfaqësuesit e përhershëm të Bullgarisë në NATO dhe Bashkimin Evropian janë informuar për incidentet. Ai gjithashtu bëri të ditur se pret të zhvillojë një bisedë me sekretarin e përgjithshëm të NATO-s, Mark Rutte.

„Bullgaria ka kërkuar mbështetje në hetimin e sulmeve ndaj tri anijeve, me qëllim që të përcaktohet me siguri se nga cili shtet vijnë dronët që po godasin anijet në afërsi të ujërave territoriale bullgare“, deklaroi Radev.
Ai shtoi se Bullgaria do të vazhdojë të kërkojë ndihmë për forcimin e mbikëqyrjes ajrore dhe detare, si dhe për përmirësimin e kapaciteteve të saj për reagim.

„Nuk kemi prova të forta dhe të qarta për të ngritur akuza ndaj asnjërës palë, por logjika, siç kam theksuar tashmë, tregon se përfituesja nga kjo situatë është Federata Ruse“, tha Radev.
Ai njoftoi gjithashtu se do ta ftojë ambasadoren ruse në Bullgari, Eleonora Mitrofanova, për një bisedë lidhur me incidentet.

/ts