Ky është heroi shqiptarë në Zvicër: Hyn mes flakëve dhe ndihmon në shpëtimin e katër të rinjve

Ngjarja ndodhi të mërkurën, më 30 shtator, rreth orës 20:45 në Alte Bremgarterstrasse. Një Fiat Punto me katër të rinj brenda doli nga rruga në një kthesë dhe u përplas frontalish me një pemë. Automjeti u përfshi menjëherë nga flakët.

Sipas raportimeve të mediave zvicerane, Ajdin Limoni, 53 vjeç, ndodhej pranë vendit të aksidentit dhe reagoi menjëherë sapo pa veturën në flakë dhe personat e bllokuar brenda.

Raportimet përshkruajnë një skenë dramatike, me flakë që kishin përfshirë automjetin dhe të rinjtë që duhej të nxirreshin sa më shpejt. Limoni thuhet se iu afrua veturës, ndërhyri për të liruar personat e bllokuar dhe, bashkë me ndihmës të tjerë, kontribuoi në nxjerrjen e katër të rinjve përpara se automjeti të digjej tërësisht.

Policia Kantonale e Aargaut ka konfirmuar se disa kalimtarë kishin arritur t’i nxirrnin të katër personat nga vetura para mbërritjes së ekipeve emergjente dhe se ndërhyrja e tyre u kishte shpëtuar jetën.

Disa nga ndihmësit pësuan vetë djegie gjatë operacionit të shpëtimit.Ajdin Limoni është shtetas i Kosovës dhe banon në Wohlen.Në veturë ndodheshin një vajzë 17-vjeçare dhe tre të rinj të moshës 17, 18 dhe 21 vjeç. Të katërt janë shtetas italianë me banim në Zvicër.Dy prej tyre pësuan lëndime shumë të rënda dhe u transportuan me helikopterë shpëtimi në spitale, ndërsa dy të tjerët u dërguan me ambulancë me lëndime mesatare deri të rënda.Njëri nga 18-vjeçarët e plagosur rëndë ndodhet në gjendje serioze dhe, sipas familjes së tij, është vendosur në koma artificiale dhe pritet t’i nënshtrohet një operacioni të madh.

Ai ka pësuar lëndime në kokë dhe fytyrë, si dhe fraktura në krah dhe këmbë.Policia kishte marrë fillimisht një alarm automatik nga telefoni celular i njërit prej personave në veturë, i cili kishte regjistruar përplasjen dhe kishte dërguar sinjal për aksident të rëndë.

Kur patrullat mbërritën, Fiat-i tashmë ishte përfshirë plotësisht nga zjarri, por të katër personat ishin nxjerrë jashtë.Ende nuk është përcaktuar se kush ishte duke e drejtuar automjetin dhe çfarë e shkaktoi daljen nga rruga. Policia po shqyrton rrethanat e aksidentit, përfshirë edhe mundësinë e shpejtësisë së lartë ose shpërqendrimit gjatë vozitjes.

Zjarrfikësit arritën gjithashtu ta pengonin përhapjen e flakëve drejt pyllit përreth, ndërsa rruga ndërmjet Wohlenit dhe Bremgartenit u mbyll përkohësisht për shkak të intervenimit dhe hetimeve.Ajo që tashmë është e qartë është se reagimi i njerëzve që nuk pritën ardhjen e ekipeve emergjente ishte vendimtar. Policia e Aargaut ka vlerësuar se ndërhyrja e tyre e guximshme u shpëtoi jetën katër të rinjve.

/ms