Izet Mexhiti dhe Mickoski në Nju Jork: Forcimi i lidhjeve shqiptaro-amerikane

Bashkëkryetari i VLEN-it, Izet Mexhiti, mori pjesë në Galën Vjetore të Këshillit të Marrëdhënieve Shqiptaro-Amerikane, të mbajtur në Nju Jork më 24 shtator.
Në një postim nga aktiviteti, Mexhiti theksoi rëndësinë e lidhjeve ndërmjet shqiptarëve dhe Shteteve të Bashkuara, duke vënë në pah rolin e diasporës shqiptaro-amerikane dhe angazhimin e saj me institucionet amerikane.

Sipas tij, mbështetja amerikane për paqen, stabilitetin, demokracinë dhe të drejtat e shqiptarëve në rajon ka pasur rëndësi në periudha të ndryshme të historisë.

Mexhiti vlerësoi gjithashtu sukseset e shqiptarëve në SHBA në biznes, diplomaci, profesione dhe jetën publike, duke theksuar se një diasporë e organizuar dhe me përfaqësim mund të kontribuojë në forcimin e bashkëpunimit dhe në artikulimin e çështjeve që lidhen me shqiptarët në Maqedoninë e Veriut, Kosovë, Shqipëri dhe rajon.

Ai e cilësoi marrëdhënien me SHBA-në si një lidhje strategjike të ndërtuar ndër dekada dhe bëri thirrje për ruajtjen e forcimin e saj përmes bashkëpunimit dhe përfaqësimit të diasporës.

/tvgurra