Blerim Ramadani: Një falënderim nga Zemra

Ka mbrëmje që nuk përfundojnë kur mbyllet aktiviteti. Ato mbeten gjatë në kujtesë, sepse mbartin emocione, njerëz dhe momente që vështirë të harrohen.
Mbrëmja e promovimit të romanit “Zemrat pas Maleve” në Konsullatën e Përgjithshme të Republikës së Kosovës në Cyrih ishte pikërisht një mbrëmje e tillë.

Ishte një mbrëmje madhështore dhe një surprizë e jashtëzakonshme për mua, që më emocionoi thellë. Për këtë arsye, ndiej një detyrim të veçantë t’u them FALEMINDERIT të gjithë atyre që e bënë të mundur dhe që ishin pjesë e saj.
Një mirënjohje e veçantë për Konsullatën e Përgjithshme të Republikës së Kosovës në Cyrih, për mikpritjen dhe përkushtimin, për Shefin e Misionit, z. Vigan Berisha, dhe Zëvendësambasadoren e Republikës së Kosovës në Bern, znj. Shukrije Ramadani , për fjalët e ngrohta dhe respektin e treguar ndaj veprimtarisë kulturore.

Faleminderit nga zemra Shoqatës së Krijuesve Shqiptarë në Zvicër, dhe në veçanti z. Bardhec Berisha nga Kosova, z. Tonin Nikolli nga Shqipëria dhe z. Bujar Salihu nga Kosova, për vlerësimin dhe prezantimin dinjitoz të romanit.
Mirënjohje e veçantë për Shoqata Kulturore Kercova , Shoqatën Shoqata Humanitare Greshnica , Oda Kërçovare Zvicër dhe Odën Folklorike Kërçovare, që me praninë dhe mbështetjen e tyre dëshmuan edhe një herë se lidhja me vendlindjen dhe kultura jonë nuk njohin kufij.

Faleminderit edhe z. Xhevahir Ramadani dhe z. Florim Useini për praninë dhe kontributin e tyre. Poashtu falënderim për familjen time që jeton në Zvicër, Flora Ramadani, Naser Dauti, Arjeta Abazi, Shpetim Abazi, Erion dhe Verona Abazi për mbështetjen e parezervë.
Një falënderim të veçantë për TV Gurra, kercova.net dhe TV Uskana, që e përcollën këtë ngjarje dhe i dhanë zë një vepre që synon të ruajë një pjesë të historisë dhe kujtesës sonë.

Dhe falënderimi më i madh shkon për ju, të gjithë ju që erdhët. Për ata që udhëtuan, që gjetën kohë, që më dhanë një dorë, një përqafim, një fjalë të mirë dhe për ata që e ndanë me mua emocionin e kësaj mbrëmjeje.
Ju kërkoj falje që nuk arrita t’ju takoj dhe t’ju përshëndes secilin veç e veç. Koha ishte e kufizuar dhe gjendja ime shëndetësore momentale nuk ishte më e mira të jem më pranë secilit prej jush ashtu siç do të dëshiroja. Shpresoj shumë në mirëkuptimin tuaj.

Ndoshta nuk arrita t’jua them të gjithëve personalisht, por dua ta them këtu:
Faleminderit që ishit aty.
Faleminderit që e respektuat librin.
Faleminderit që respektuat historinë.
Faleminderit që më dhatë mua një mbrëmje që do ta mbaj gjatë në zemër.
“Zemrat pas Maleve” është një histori për Besën, humanizmin, sakrificën dhe njerëzillëkun. Dhe sonte, përmes jush, ajo histori mori një tjetër kuptim.
Me shumë respekt, emocion dhe mirënjohje,
Blerim Ramadani

/ms