Një person humbi jetën, ndërsa tre të tjerë u lënduan në një aksident të rëndë trafiku në Strazhë !

Një person humbi jetën, ndërsa tre të tjerë u lënduan në një aksident të rëndë trafiku që ndodhi mbrëmë në Strazhë, njoftoi MPB-ja.
Sipas informacioneve të MPB-së, aksidenti është raportuar në orën 22:55 në SPB Tetovë. Në aksident janë përfshirë dy vetura të tipit „Golf“.

Njëri „Golf“, me targa të Gostivarit, drejtohej nga 34-vjeçari A.I. nga fshati Çegran, ndërsa bashkudhëtar ishte 28-vjeçari H.K. nga Gostivari. Automjeti i dytë, me targa të Tetovës, drejtohej nga 21-vjeçari D.N. nga Tetova, ndërsa bashkudhëtare ishte 21-vjeçarja F.J., gjithashtu nga Tetova.

Mjeku i Ndihmës së Shpejtë Mjekësore konstatoi në vendin e aksidentit vdekjen e drejtuesit të automjetit, D.N.

Tre personat e tjerë u dërguan në Qendrën Mjekësore në Gostivar, ku u konstatuan lëndime trupore.
Këqyrjen në vendin e ngjarjes e kryen një prokuror publik dhe ekipi hetimor i MPB Gostivar.

/ms