Aksident: Katër të lënduar në përplasje me automjet të policisë afër Kërçovës !

Katër persona përfunduan me lëndime trupore në një përplasje në rrugën magjistrale Gostivar–Kërçovë, ndërsa në aksident u përfshi edhe një automjet zyrtar i Ministrisë së Punëve të Brendshme. Njoftimi arriti në Stacionin Policor të Kërçovës në orën 18:20.

Në përplasje u përfshinë një automjet udhëtarësh „Volkswagen Sharan“, me targa të Shkupit, në timonin e të cilit ishte një shofer 26-vjeçar nga Shkupi, si dhe një „Rexton“ në pronësi të MPB-së. Të lënduarit janë të gjithë bashkudhëtarë nga „Sharani“: dy burra të moshës 67 dhe 70 vjeç dhe një 44-vjeçar, të tre nga fshati Veleshtë i Strugës, si dhe një 22-vjeçar nga Shkupi.

Lëndimet iu konstatuan në Qendrën Mjekësore në Kërçovë. Këqyrjen në vendngjarje e kreu një ekip i Stacionit Policor të Kërçovës, pikërisht i të njëjtit stacion automjeti i të cilit mori pjesë në aksident.

Këtu është edhe pjesa që kumtesa nuk e shpjegon: kush e drejtonte „Rexton“-in zyrtar, me çfarë shpejtësie dhe me fajin e kujt ndodhi përplasja? Për këtë nuk thuhet asnjë fjalë.

Përshkruhet dinamika e aksidentit, por jo përgjegjësia. Kur një automjet policor është pjesëmarrës në një aksident me katër të lënduar, pyetja se kush e përcakton fajin nuk është formalitet, por vetë thelbi i çështjes.

/metla.mk