Gjithçka që duhet të bëni nëse largoheni nga Zvicra ?

Largimi përfundimtar nga Zvicra kërkon disa procedura administrative. Ja çfarë duhet të rregulloni para nisjes:

Banesa me qira
Kontrolloni afatin e njoftimit në kontratë dhe njoftoni pronarin me shkrim. Nëse largoheni para afatit, mund t’ju duhet të gjeni një qiramarrës tjetër. Mos harroni pastrimin, dorëzimin e banesës, parkimin, sigurimet dhe faturat e lidhura me shtëpinë.

Nëse zotëroni pronë
Vendosni nëse do ta shisni apo mbani. Nëse e mbani, konsultohuni me bankën për hipotekën dhe informohuni për pasojat tatimore.

Çregjistrimi nga komuna
Duhet të çregjistroheni në komunën ku banoni, zakonisht deri në 30 ditë para largimit. Certifikata e çregjistrimit do t’ju nevojitet për anulimin e sigurimit shëndetësor dhe procedura të tjera.

Zakonisht kërkohen: pasaporta ose karta e identitetit;
leja e qëndrimit;
dëshmia e regjistrimit;
tarifa për certifikatën e çregjistrimit.

Banka dhe taksat
Kontaktoni bankën për të parë nëse mund ta mbani llogarinë zvicerane pas largimit. Anuloni debitimet direkte dhe rregulloni çdo detyrim tatimor të mbetur.

Leja e qëndrimit
Në disa raste, personat me leje B ose C mund të kërkojnë ruajtjen e përkohshme të lejes nëse planifikojnë të kthehen. Kjo duhet të diskutohet me autoritetet përkatëse.

Sigurimi shëndetësor
Pas çregjistrimit, sigurimi bazë zviceran zakonisht mund të anulohet duke paraqitur certifikatën e largimit.

Pensioni
Informohuni se çfarë ndodh me AHV/IV dhe pensionin profesional. Në varësi të shtetësisë dhe vendit ku zhvendoseni, mund të ekzistojnë mundësi të ndryshme për transferim ose tërheqje të kontributeve.

Makina dhe patenta
Nëse keni automjet të regjistruar në Zvicër, njoftoni zyrën kantonale të trafikut. Kontrolloni gjithashtu nëse patenta zvicerane njihet në vendin ku do të jetoni.

Anuloni kontratat dhe abonimet
Mos harroni telefonin, internetin, abonimet e transportit, sigurimet, anëtarësimet dhe shërbime të tjera me pagesë. Njoftoni gjithashtu shkollën ose çerdhen e fëmijëve.

Dogana dhe kafshët shtëpiake
Kontrolloni rregullat doganore për mobiliet, automjetet dhe sendet personale. Nëse merrni kafshë shtëpiake me vete, kontrolloni dokumentet dhe kushtet veterinare.

Ridrejtimi i postës
Posta Zvicerane ofron mundësinë që posta juaj të dërgohet në adresën e re jashtë vendit.
Me pak planifikim dhe duke i rregulluar këto çështje me kohë, largimi përfundimtar nga Zvicra mund të bëhet shumë më i thjeshtë.

/albinfo