Ahmeti kërkon zgjedhje të parakohshme, VLEN: Nuk janë të nevojshme, por jemi gati

Duke kritikuar VLEN-in për hyrjen në Qeveri pa legjitimitet politik, kreu i BDI-së Ali Ahmeti, në emisionin “Click” në RTV21, uroi që ky të jetë “gabimi i fundit” i partive shqiptare që nuk do ta përsërisin në të ardhmen. Zgjidhja më e mirë për Maqedoninë, sipas tij, janë zgjedhjet e parakohshme vitin e ardhshëm.

“Duhet të ndryshohet klima, sigurisht ma merr mendja që edhe partia shumicë maqedonase e ka kuptuar se gjërat nuk shkojnë mirë. Duhet pasur kujdes në përzgjedhjen dhe respektim të shumicës së shqiptarëve dhe zgjidhja më e mirë do të ishte zgjedhjet e parakohshme. Nesër me u mbajt, ne jemi gati!”, theksoi Ali Ahmeti, kryetar i BDI-së.

Të gatshëm për zgjedhje, kurdo qofshin ato, shprehen edhe nga partia në pushtet VLEN, por zëdhënësi Driton Sulejmani konsideron se nuk janë të nevojshme. Kjo pasi, siç shtoi, duhet ta çojnë mandatin deri në fund sepse kanë dhënë shumë premtime që duhet t’i realizojnë.

“Ne jemi të gatshëm kurdo që mbahen zgjedhje të parakohshme të dalim në ato zgjedhje të kërkojmë besimin e qytetarëve dhe mendoj se do ta marrim besimin e qytetarëve për arsye se kemi kontribuar në zgjedhjen e shumë problemeve që kanë të bëjnë me qytetarët. Mirëpo, vlerësojmë se nuk janë të nevojshme zgjedhjet”, u shpreh Driton Sulejmani, zëdhënës i VLEN-it.

Edhe kryeministri Hristijan Mickoski para 3 javësh tha se kjo Qeveri ka mandat deri në vitin 2028, një periudhë në të cilën qytetarët presin përmbushjen e premtimeve të dhëna para zgjedhjeve, por shefi i ekzekutivit shtoi se janë gjithmonë të gatshëm t’i përgjigjen sfidës së zgjedhjeve të parakohshme nëse sfidohen ta bëjnë këtë.

/tv21