Anulohet gjykimi për rastin e Llaskarcës, ku humbën jetën 16 persona

Është anuluar seanca gjyqësore për rastin e fatkeqësisë në Llaskarcë, përshkak se njëri nga të akuzuarit ka pësuar probleme shëndetësore.

Përgjegjësi i parkut të makinave të Durmo Tursit, Ramiz Miftari, sot i është nënshtruar një operacioni dhe për këtë arsye nuk janë sjell edhe të akuzuarit e tjerë nga paraburgimi.

Lëndën e përfaqëson prokurori i Prokurorisë Themelore të Shkupit, Darko Jakimovski, ndërkaq gjykatëse janë Diana Gruevska-Ilievska, Aleksandra Risteska dhe tre gjykatës të tjerë.

Në seancën e kaluar, prokurori Jakimovski tha se, aksidenti ka qenë çështje kohësh se kur do të ndodh, ngaqë ai ka grumbulluar lëshime të mëdha që nuk janë spontane. Jakimovski ka deklaruar se vetëm në vitin 2019 janë konstatuar parregullsi në 80 autobusë gjatë kontrollit teknik.

Seancë e re gjyqësore është caktuar për më 15 tetor.

/Alsat