Urime: Kërçovarja Almedina Topalovska shpallet studentja më e mirë në Fakultetin e Shkencave Teknike në UNT

Universiteti “Nënë Tereza” në Shkup (UNT) ka promovuar gjeneratën e tetë të absolventëve në një ceremoni solemne dhe madhështore të organizuar nën emrin “Absolventiada 2026”, ku studentët përmbyllën me sukses një etapë të rëndësishme të jetës së tyre akademike.

Në këtë ngjarje të veçantë, një moment kulmor ishte ngjitja në skenë e pesë studentëve më të dalluar të gjeneratës, të cilët u nderuan me mirënjohje për rezultatet e tyre të shkëlqyera dhe kontributin akademik gjatë studimeve.

Ndër ta u veçua kërçovarja Almedina Topalovska, e cila u shpall studentja më e mirë e Fakultetit të Shkencave Teknike, me një mesatare mbresëlënëse prej 9.80.
Ajo u vlerësua për përkushtimin, disiplinën dhe arritjet e larta akademike gjatë gjithë periudhës së studimeve.

Ky sukses shihet si dëshmi e punës së përkushtuar të vetë studentes, por edhe e mbështetjes dhe vlerave nga mësimdhënësit nga Gjimnazit DRITA në Kërçovë, që kanë kontribuar në formimin e gjeneratave të reja të suksesshme.
Në këtë kontekst, theksohet nevoja që këto arritje të vlerësohen dhe të krijohen kushte më të mira që të rinjtë e talentuar të mos largohen drejt vendeve perëndimore, por të gjejnë perspektivë dhe zhvillim në vendlindje.

/votra