Kërçovë: Çifti i mësuesve Sabije dhe Aqif Zenku pensionohen së bashku pas katër dekadash në arsim

Një moment i veçantë dhe emocional shënoi fundin e këtij viti shkollor, pasi çifti i mësuesve Sabije Zenku dhe Aqif Zenku u pensionuan njëkohësisht, duke përmbyllur me sukses një rrugëtim mbi 40-vjeçar në shërbim të arsimit.

Për më shumë se katër dekada, ata edukuan dhe formuan breza të tërë nxënësish, duke u dalluar për profesionalizmin, përkushtimin dhe dashurinë ndaj misionit fisnik të mësuesit. Me punën e tyre të palodhur, Sabije dhe Aqif Zenku lanë gjurmë të pashlyeshme në jetën e shumë nxënësve, të cilët sot i kujtojnë me respekt dhe mirënjohje.

Në këtë ditë të veçantë, familjarët, kolegët, miqtë dhe ish-nxënësit shprehën falënderimet e tyre për kontributin e jashtëzakonshëm që ky çift ka dhënë ndër vite në edukimin dhe arsimimin e gjeneratave të reja.

Pensionimi i tyre shënon fundin e një kapitulli të rëndësishëm, por edhe fillimin e një etape të re të jetës, të mbushur me qetësi, lumturi dhe momente të bukura pranë familjes.
Sabije dhe Aqif Zenku mbeten shembull i përkushtimit dhe i dashurisë për arsimin, ndërsa vepra dhe kontributi i tyre do të kujtohen gjatë nga të gjithë ata që patën fatin t’i kenë mësues.

/votra