Zvicër: Sulmuesi bërtet “Allahu Ekber” ! Disa të plagosur

Të enjten në mëngjes, në stacionin e trenit në Winterthur ka ndodhur një sulm i rëndë, ku një 31-vjeçar ka goditur me thikë disa kalimtarë, transmeton albinfo.ch.
Sipas Policisë Kantonale të Cyrihut, nga sulmi janë plagosur tre persona – një prej tyre rëndë dhe dy të tjerë mesatarisht. Të gjithë të lënduarit janë dërguar për trajtim në spitale.

Autori i dyshuar është arrestuar në vendin e ngjarjes nga forcat e policisë dhe sigurimi i stacionit. transmeton tutje albinfo.ch.
Dëshmitarë okularë kanë deklaruar se gjatë sulmit, autori ka bërtitur disa herë “Allahu akbar”. Ngjarja ka shkaktuar panik në zonë, ndërsa shumë persona janë larguar me shpejtësi për të shmangur rrezikun, përfshirë edhe një grup fëmijësh.

Sipas dëshmive, sulmi ka ndodhur rreth orës 08:30 të mëngjesit, ndërsa zona përreth stacionit është mbyllur përkohësisht nga policia. Në disa pjesë janë vendosur edhe barriera dhe perde mbrojtëse për hetime.

Autoritetet kanë konfirmuar se situata është vënë shpejt nën kontroll dhe se hetimet po vazhdojnë për të sqaruar motivin e sulmit, i cili aktualisht mbetet i panjohur dhe po hetohet në të gjitha drejtimet.

/Albinfo.ch