Urime: Kërçovari Muxhahid Mislimi kampion i Kupës së Maqedonisë në 5000 metra

Klubi atletik AK Uskana ka shënuar një tjetër sukses të rëndësishëm në skenën sportive, pasi atleti Muxhahid Mislimi u shpall kampion i Kupës së Maqedonisë për Seniorë 2026 në disiplinën 5000 metra.

Mislimi triumfoi me kohën 15:24.69, duke regjistruar rezultat personal dhe një nga paraqitjet më të mira në këtë disiplinë në rreth dy dekadat e fundit. Gara u karakterizua me rivalitet të fortë, ritëm të lartë dhe një finish dramatik që u vendos vetëm në sprintin final.

Sipas statistikave të garës, 200 metrat e fundit u përshkuan për 29.4 sekonda, ndërsa 100 metrat e fundit për 13.7 sekonda, duke dëshmuar formën e shkëlqyer dhe përgatitjen fizike të atletit.

Një tjetër tregues i nivelit të lartë ishte edhe fakti se katër atletë e përfunduan garën nën 16 minuta, duke e bërë këtë një nga garat më cilësore të viteve të fundit në 5000 metra.

Ky sukses konsiderohet arritje e rëndësishme për AK Uskana dhe sportin e Kërçovës, duke dëshmuar punën, përkushtimin dhe shpirtin garues të atletëve të klubit.
Urime kampionit Muxhahid Mislimi për këtë sukses të merituar.

/tvgurra