VLEN-i bashkimi që sjelli faktorizim, si lindi dhe ku është sot?

Porosia dhe kërkesa e dikurshme e Ali Ahmetit për zvogëlimin e numrit të madh të partive shqiptare me qëllim të ruajtjes së votave të elektoratit shqiptar, si në zgjedhje parlamentare ashtu edhe në ato komunale, ndodhi nga tash kundërshtarët e tij politik.

Një pjesë e anétarëve të BDI-së dhe parti të tjera kundërshtare u bashkuan sipas të njëjtës formulë, për të shkaktuar pikërisht atë që Ahmeti dhe partia e tij nuk e dëshironin e as mendonin se do t’ju ndodhte.
Dhe rezultati tash quhet VLEN, duke krijuar kështu në zgjedhjet e kaluara parlamentare dhe ato komunale dy grupime të mëdha në skenën politike shqiptare të RMV-së.

E përderisa të bashkuarit në VLEN e vazhdojnë atë që e nisën, BDI-së i ndodhi e kundërta, sepse një pjesë e Frontit Evropian u largua për t’u kthyer ashtu siç ishin: të përçarë, shkruan Zhurnal.

Si lindi VLEN-i?
Në RMV fenomeni “një mëhallë një parti” kishte krijuar një skenë politike të stërngarkuar me parti të vogla shqiptare, shpesh pa ndikim real. Ky fragmentim prodhoi dy pasoja të mëdha: zgjatjen e pushtetit të një partie të vetme që në këtë rast ishte BDI, dhe defaktorizimin e një pjese të votave shqiptare të cilat humbeshin nga moskualifikimi.

Grupimi opozitës dukej i pamundur, por kur ndodhi solli menjëherë ndryshim të madh: opozita kaloi në pushtet.
Lëvizjet e para filluan gjatë periudhës 2023–2024 kur edhe u formua koalicioni LEN (Lëvizja Evropiane për Ndryshim), i përbërë nga BESA, Alternativa dhe Lëvizja Demokratike. Më pas LEN-it iu bashkangjit edhe ASH-ja e Taravarit me çka u krijua koalicioni më i madh politik në kampin shqiptar mes partive shqiptare. Atyre iu bashkuan edhe përfaqësuesit të VV-së për ta pagëzuar nga LEN në VLEN.
Qysh atë kohë brendi VLEN u konsolidua si formacion politik, duke u dalluar nga daljet e mëvonshme dhe prurjet e vazhdueshme.

Votat e para për VLEN
Në zgjedhjet parlamentare të 8 majit 2024, VLEN fitoi 107 mijë vota dhe siguroi 14 deputetë në Kuvend. Në ato presidenciale, kandidati i VLEN-it atëkohë, Arben Taravari, nuk arriti në balotazh apo raundin e dytë, por koalicioni u pozicionua si faktor vendimtar në negociatat pas-zgjedhore.

Koalicioni qeverisës VMRO-DPMNE me 58 mandate, VLEN me 14 mandate dhe ZNAM 6 mandate formuan qeverinë me gjithsej 78 deputetë, duke krijuar kështu shumicë stabile.
VLEN arriti që të marrë pozita kyçe në kuvend e qeveri.

Kryetar i Kuvendit u bë Afrim Gashi. Ministra shqiptarë nga VLEN janë: Muamet Hoxha për Mjedisin, Besar Durmishi për Ekonominë dhe Punën, Azir Aliu për Shëndetësinë, Fatmir Limani për Politiken Sociale.
VLEN ka edhe dy pozitat e zëvendëskryeministrit, Bekim Sali u bë Ministër për Diasporën, e zëvendëskryeministër i parë Arben Fetai.
VLEN ka gjithashtu zëvendësministra dhe drejtori të rëndësishme.

Kjo tregon se VLEN ka arritur një pozicion të konsoliduar në pushtet, duke zëvendësuar BDI-në pas 20 vitesh dominim dhe duke u shfaqur si alternativa e re shqiptare në politikën e RMV.
VLEN shtrirjen e mirë në vend dhe pozicionimin e duhur në pushtet e dëshmoi edhe në zgjedhjet lokale të tetorit 2025, ku arriti të fitojë në 10 komuna me shumicë shqiptare.
VLEN nuk ka përjetuar rënie deri më sot. Përkundrazi, ka qenë në ngritje për shkak të pjesëmarrjes në pushtet.

VLEN sot
Më 9 maj 2026 VLEN pritet të shndërrohet zyrtarisht në një parti të vetme politike, duke konsoliduar katër forcat që e përbëjnë. Kështu që, nga një opozitë e copëtuar VLEN u shndërrua në një forcë të bashkuar që sot mban poste kyçe në pushtet.

Natyrisht që VLEN përballet edhe me probleme të shumta që vijnë dhe burojnë edhe nga brenda koalicionit qeveritar, siç është rasti me ministrat e ZNAM-it e të tjera.

Nga ana tjetër, sot VLEN para vetes ka disa sfida që janë jetike për shqiptarët; Ligji për përdorimin e gjuhëve; Ligji për përfaqësimin të drejtë dhe adekuat; Ligji për provimin e jurisprudencës, e të tjera.
Këto çështje të cilat kanë të bëjnë me drejtat e shqiptarëve në vend, këto ligje, janë sfida të mëdha të cilat do të ndikojnë jashtëzakonisht shumë në të ardhmen e VLEN.

/Zhurnal.mk