Zvicra dhe Maqedonia e Veriut synojnë të forcojnë marrëdheniet ekonomike ?

Autoritetet e të dy vendeve, por edhe përfaqësuesit e kompanive të të dy palëve, sot gjatë takimeve në Shkup kanë biseduar për forcimin e mëtejmë të marrëdhenieve ekonomike dypalëshe.
Kryetari i Zvicrës Guy Bernard Parmelin dhe një delegacion shoqërues ndodhen në Shkup, pas vizitës së tyre në Beograd me të njëjtin qëllim bashkëpunimi edhe me Serbinë, raporton Zhurnal.mk.

Parmelin sot është takuar me Kryetaren Gordana Siljanovska-Davkova si dhe me Kryeministrin Hristijan Mickoski.
Pas takimit me Siljanovska-Davkova ai tha se Zvicra synon që bashkëpunimi të “thellohet në fushat e ekonomisë, investimeve dhe inovacionit. “
Që të dy kanë folur edhe për rëndësinë e stabilitetit të rajonit ballkanik si dhe zhvillimet rreth procesit të integrimeve evropiane të rajonit.

“Zvicra ndjek nga afër perspektivat evropiane të këtyre vendeve dhe i mbështet ato në masën që është në interesin tonë. Programi i bashkëpunimit zviceran, i cili aktualisht është i buxhetuar deri në vitin 2028, synon të mbështesë Maqedoninë e Veriut në rrugën e saj drejt integrimit evropian,” tha Parmelin në konferencën për shtyp.

Marrëdhëniet ekonomike dhe tregtia midis dy vendeve mbeten modeste, me një vëllim tregtar prej 184 milionë CHF në vitin 2025, sipas të dhënave të entit të statistikace zvicerane, raporton Zhurnal.mk.
Zvicra eksporton kryesisht produkte kimike dhe farmaceutike dhe automjete në Maqedoninë e Veriut dhe importon kryesisht tekstile dhe produkte bujqësore.
Takime sot kanë zhvilluar edhe përfaqësuesit e kompanive të të dy vendeve, pikërisht për thellimin e bashkëpunimit ekonomik midis të dy vendeve.

Në këtë takim ka marrë pjesë edhe Mickoski, para se të takohet me Parmelin.
“Kjo ngjarje [takim] paraqiti një mundësi të shkëlqyer për të shkëmbyer përvoja, ide dhe për të thelluar bashkëpunimin ekonomik midis dy vendeve,” tha Mickoski përmes një teksti në Facebook, në të cilin siç tha ai u theksua “rëndësia e partneritetit ekonomik, investimeve dhe mbështetjes për zhvillimin e sektorit të biznesit.”

“Ky aktivitet është një hap tjetër përpara drejt forcimit të marrëdhënieve dypalëshe dhe hapjes së mundësive të reja për bashkëpunim,” shtoi Mickoski.
Parmelin ndërkohë është takuar dhe me kryetarin e Kuvendit Afrim Gashi.

“Diskutuam për mundësitë e thellimit të mëtejshëm të bashkëpunimit, si në nivel bilateral ashtu edhe në atë ndërparlamentar, si dhe forcimin e institucioneve demokratike. Theksova se një vend të veçantë në këtë partneritet zë edhe diaspora jonë në Zvicër, e cila përbën një urë të fuqishme lidhëse dhe jep kontribut të çmuar për zhvillimin e marrëdhënieve tona. Kjo vizitë përbën një dëshmi të përkushtimit të përbashkët për ndërtimin e një partneriteti të qëndrueshëm dhe afatgjatë,” ka shkruar përmes Facebook Gashi pas takimit.

/ Zhurnal.mk.